Privatizimi i UKT, Veliaj: Jemi në negociata, presim ofertat më të mira
Ujësjellësi investim në Shkozë për rrjetin e ujërave të zeza, përfitojnë 400 familje "S'do ketë ndikim në çmim, e përcakton Enti"
Ndërmarrja e Ujësjellës- Kanalizi meve Tiranë do të privatizohet. Kjo gjë është konfirmuar nga kreu i Bashkisë së Tiranës, Erion Veliaj ditën e djeshme, gjatë inspektimit të punimeve në kanalizimin e ujërave të zeza në zonën e Shkozës. Sipas kreut të bashkisë, nëse do bëhet privatizimi, nuk do të ketë asnjë ndikim në çmimin e ujit për qytetarët, por vetëm në rritjen e cilësisë së shërbimit.
PRIVATIZIMI
Falë bilancit shumë të mirë të ndërmarrjes së UKT- së, disa kompani private kanë shprehur interesin për ta privatizuar. Kjo gjë është konfirmuar nga kreu i Bashkisë së Tiranës, Erion Veliaj, i cili ka garantuar qytetarët se nuk do të ketë rritje të çmimit të ujit edhe pas privatizimit, pasi çmimet i përcakton Enti Rregullator i Ujit ( ERRU) dhe jo kompania private. "Kemi marrë disa oferta dhe shprehje interesi. Jemi ende në një proces negociatash dhe dua t'i garantoj qytetarët që do të bëjmë më të mirën, derisa të bindemi që kemi marrë ofertën më të mirë për UKT- në. Ky është një kompliment për punën e UKTsë, është e para kompani nga 61 ujësjellësit e bashkive të reja që merr një vlerësim të tillë dhe po kuotohet në treg falë performancës në rritje edhe arkëtimeve nga qytetarët, që janë shumë më të përgjegjshëm me përdorimin e ujit të pijshëm", - u shpreh Veliaj. Por, ai ka garantuar qytetarët e Tiranës se, nëse ky privatizim do të kryhet me sukses, ai do të ketë vetëm efekte më të mira në furnizimin me ujë të të gjitha familjeve dhe bizneseve, dhe nga ana tjetër nuk do të ketë asnjë ndikim në çmimin e ujit. "Së pari, kjo nuk e impakton çmimin e shitjes së ujit të pijshëm. Ky është një çmim i cili caktohet nga enti rregullator, ashtu si çmimi i energjisë; pra, nuk ka të bëjë fare kush e ka paketën e aksionarëve në kompani, sepse çmimi caktohet nga Enti Shtetëror i Ujit. Së dyti, i garantoj qytetarët që çdo qindarkë që vjen nga një negociatë e suksesshme do të përkthehet automatikisht në investime për qytetin e Tiranës, dhe besoj se shumë shpejt do të kemi mundësi t'i shikojmë dukun gjithë kësaj pune që është bërë", - theksoi kryetari i bashkisë.
INVESTIMET
Në kuadër të investimeve kyçe që po kryen në gjithë Tiranën, bashkia dhe UKT- ja janë fokusuar jo vetëm në përmirësimin e vazhdueshëm dhe investimet në rrjetin e ujësjellësit, por edhe në atë të kanalizimeve. Në këtë kuadër ka nisur puna për ndërtimin e rrjetit të kanalizimeve në zonën e ish- Uzinës së Autotraktorëve në Shkozë, e cila kufizohet nga rruga "Ali Shefqe- ti" dhe lumi i Lanës. Në përgjithësi kjo është një zonë me objekte të ish- Uzinës së Autotraktorëve, të cilat janë përshtatur nga banorët si objekte banimi 1 deri në 2 kate dhe ku shkarkimi i ujërave të zeza i objekteve është bërë në mënyrë individuale nga banorët në tubacionet ekzistuese të ish- uzinës, çka ka bërë që herë pas here në këtë zonë të ketë probleme me daljen e ujërave të zeza në sipërfaqe. Tashmë, është parashikuar të shtrohen një deri në dy tubacione sipas projektit të paraqitur, të cilat do mbledhin të gjitha shkarkimet e banesave të kësaj zone, që më pas do të shkarkojnë në kolektorin kryesor. Nga ky investim, sipas kryebashkiakut Veliaj, përfitojnë rreth 400 familje në zonën e Shkozës.