"Të investohet për aeroportin e Gjirokastrës"
Ish- shefi i operacioneve të fluturimit, Dritan Goxhaj: Ka më shumë përparësi se ai i Sarandës Specialistët: Ka kapacitetin e duhur dhe do u shërbejë disa qyteteve
Qeveria nuk ka pse shpenzon para për të bërë studimin se ku do të ngrihet aeroporti i jugut, por duhej ta kishte alokuar direkt këtë fond studimi, mbi fizibilitetin e aeroportit të Gjirokastrës". Kështu pohoi dje ish- shefi i operacioneve të fluturimit të autoritetit aviacionit civil, Dritan Goxhaj. Sipas tij, ky aeroport përveç që është shumëvjeçar dhe ka edhe histori aviacioni, është në pozicionin më të mirë të favorshëm për rivitalizimin e tij. "Ky aeroport ka një sipërfaqe prej 124.000 m2. Me një sipërfaqe të tillë do kishte mundësi të ngrihej një pistë e gjatë deri në 2000 m, në mënyrë që aty të uleshin edhe avionë me kapacitet deri në 150 pasagjerë, siç është A319, i cili mund të ulet dhe ngrihet në një pistë të tillë.
Në rast se do kishim një aeroport të tillë me kapacitet pasagjerësh nga 100- 150 për avion, atëherë do të kishim një lëvizje të fluksit të pasagjerëve në jug të Shqipërisë", tha Goxhaj. Ndërkohë, ai argumentoi se kjo do të ndodhte vetëm në rast se ky aeroport do ndërtohej në Gjirokastër, pasi kështu do të mund t'u shërbente disa qyteteve si: Tepelena, Përmeti, Këlcyra, Leskoviku, Ballshi, të cilat duke shfrytëzuar superstradën Levan- Gjirokastër, do ishin më afër Gjirokastrës sesa Tiranës për fluturim dhe në fund këtë aeroport do e shfrytëzonte edhe Saranda.
AEROPORTI
Ish- shefi i operacioneve të fluturimit pohoi se në rast se aeroporti do të ndërtohej në Sarandë, ai do të mbetej i izoluar dhe sezonal, pasi distanca nga Gjirokastra në Sarandë tashmë është shkurtuar në 45 minuta me makinë. "Në Sarandë, qeverisë do i duhej të shpronësonte një sasi të madhe tokash, pasi fusha e aviacionit atje ka një sipërfaqe aktuale prej 52.000 m2, ndërsa në Gjirokastër kjo sipërfaqe është dyfish dhe nevoja për shpronësime është zero, ose tepër minimale", tha specialisti i fluturimeve, Dritan Goxhaj. Edhe studiues, përfaqësues të pushtetit vendor dhe shoqërisë civile, e konsiderojnë ndërtimin e aeroportit në Gjirokastër tepër të domosdoshëm, bazuar edhe në sugjerimet konkrete të specialistëve vendës e të huaj, sipas të cilëve, ky aeroport i plotëson të gjithë elementët teknikë për t'u kthyer në një aeroport rajonal ndërkombëtar. I ndodhur në trekëndëshin Gjirokastër- Berat- Butrint, investimi për ndërtimin e tij do të përkthehej në zhvillim ekonomik të zonës. Për më tepër se distanca me aeroportin e Igumenicës në Greqi është shumë e shkurtër, çka do të sillte një lëvizje të madhe të qytetarëve, duke eliminuar udhëtimin e gjatë drejt pikës së Kakavijës, Tri Urave në Përmet dhe Sopikut. Po sipas specialistëve dhe vendorëve, rikthimi në funksion i aeroportit 87vjeçar të Gjirokastrës është një ndër projektet që synon të marrë jetë në qytetin e gurtë, kjo për vetë pozicionin gjeografik, potencialin turistik, por edhe lëvizjes më të lehtë të emigrantëve të shumtë në rajonin jugor. Për ndërtimin e aeroportit janë hartuar dy projekte, ndërsa specialistët thonë se i ka të gjitha parametrat për t'u riaktivizuar. Në vitin 2010, përfaqësues të një kompanie italiane shprehën interesin e tyre në riaktivizimin e aeroportit të Gjirokastrës për fluturimet charter edhe të brendshme nga ky aeroport, si edhe hapjen e një shkolle aeronautike. Por, duket se këto projekte dhe ide ngelën pezull dhe ende sot nuk është bërë diçka konkrete.