"Gjunjëzohet" Italia, mbi 120 të vdekur, qindra të plagosur
Kryeministri Renzi: Po marrim masa urgjente, jemi pranë familjeve të viktimave 7 lëkundje shkatërrojnë qytetin, vijojnë kërkimet për të mbijetuarit
Një tërmet i fu qishëm ka ' gjunjë zuar' Italinë Qendrore në orët e para të mëngjesit të ditës së djeshme, duke shkaktuar të vdekur e të plagosur, ndërsa banesa e deri qyteza janë rrafshuar. Lëkundja e parë, me magnitudë 6 e shkallës Rihter ndodhi rreth orës 03: 36 me epiqendër 2 km larg Açumoli ( Rieti). Pas lëkundjes së parë, janë ndjerë edhe dy të tjera, me mangitudë 5,1 dhe 5.4, me epiqendër 5 km larg Norcia- s. Zona e Amatrice ka pësuar dëmet më të mëdha, ku kryebashkiaku i saj është shprehur se qyteti pothuajse nuk ekziston më. Ndër zonat e prekura rëndë janë edhe Açumoli e Arquata del Tronto. Sipas mediave italiane, deri pasditen e djeshme 120 persona kanë humbur jetën, mes tyre shumë fëmijë. Ndërsa 100 të tjerë janë plagosur dhe 150 janë të zhdukur nën rrënoja. Ndërkohë, nga ora në orë bilanci i viktimave është rritur. Zona që u godit nga tërmeti në Itali është shumë pranë Aquilas, që u shkatërrua nga një tërmet i fortë në 2009- ën. Në këtë zonë ka shumë ndërtime historike, monumente kulture, të cilat janë rrënuar. Mediat italiane bëjnë të ditur se një helikopter me 9 të plagosur nga tërmeti në Amatrice ka mbërritur në spitalin ' Gemelli' në Romë. Një tjetër tërmet i fuqishëm është ndjerë rreth orës 13: 50 në Arquata del Tronto, pak kilometra larg zonës ku kishte epiqendrën tërmeti shkatërrues, që rrafshoi qytete e shkaktoi dhjetëra viktima në Italinë Qendrore. Sipas mediave italiane, lëkundjet janë ndjerë edhe në Romë. Qyteti Açumoli është ndër qytetet ku tërmeti ka shkaktuar më tepër dëme. "Qyteti është pothuajse i shkatërruar, godina e policisë, kishat dhe shumë banesa janë rrafshuar", deklaroi kryebashkiaku Stefano Petruçi. I menjëhershëm ka qenë edhe reagimi i kryeministrit Edi Rama pas tragjedisë së ditës së djeshme në Itali. Kryeministri ka ngushëlluar shtetin fqinj duke shprehur solidaritetin me popullin si edhe me qeverinë italiane. "Një ditë e trishtueshme për Italinë mike! Ngushëllimet më të ndjera për viktimat e tërmetit e solidaritet vëllazëror me popullin e qeverinë!", ka shkruar Rama në faqen e tij në "Facebook". "Dhimbje dhe solidaritet me popullin italian dhe qeverinë italiane në këto momente të vështira, që la pas tërmeti i fuqishëm në orët e para të mëngjesit të sotëm. Jemi pranë familjeve të bashkëqytetarëve tanë dhe u urojmë shërim sa më të shpejtë të plagosurve! Ngushëllime familjeve të viktimave! Mendimet dhe lutjet tona janë me të lënduarit dhe familjet e viktimave", ka qenë ky reagimi i kryetarit të Partisë Demokratike, Lulzim Basha në rrjetet sociale. "Në emër të Kuvendit të Shqipërisë dhe në emrin tim personal dëshiroj t'ju shpreh ngushëllimet më të sinqerta për ju dhe popullit italian, për viktimat dhe dëmet e shkaktuara nga tërmeti i ditës së sotme. Kjo tragjedi ka tronditur thellë popullin shqiptar, i cili në këto çaste të vështira edhe për të, ndodhet pranë popullit mik italian, pranë familjeve të viktimave dhe të dashurve të tyre", shkruan zoti Meta. Kreu i shtetit shqiptar i shpreh ngushëllimet presidentit Mattarella për viktimat e tërmetit që goditi disa qytete të Italisë Qendrore. "Me hidhërim të thellë u shpreh ngushëllimet më të ndjera familjarëve të viktimave dhe ju siguroj se në këto momente të vështira dhe dhimbjeje, unë dhe populli shqiptar jemi me familjet e prekura nga tërmeti, me ju dhe popullin mik italian".