Tërmeti apokaliptik, identifikohen viktimat e para, ja historitë e tyre
Mediat italiane publikojnë fotot e viktimave
Ora
03: 36 e 24 gushtit 2016 do të mbahet mend gjatë nga italianët, të cilët u përballën me katastrofën që shkaktoi tërmeti 6.2 ballë. Toka vijon të lëkundet në Italinë qendrore, ku tërmeti i së mërkurës ka lënë pas dhimbje pafund. Zonat më të goditura nga tërmeti janë Amatrice, Arquata del Tronto, Pescara del Tronto dhe Accumoli, ku tërmeti shkaktoi 241 viktima e shumë të plagosur. Mediat italiane kanë publikuar fotografitë dhe historitë e disa prej viktimave. Ana Huete, 26 vjeçe, me origjinë nga Granada në Spanjë. Ishte e fejuar me një italian dhe ndodhej në një nga zonat e prekura nga tërmeti, për të kaluar pushimet në familjen e të fejuarit. Marisol Piermarini, 18muajshe, u nxor e gjallë nga gërmadhat në Arquata del Tronto, por humbi jetën në spital. Prindërit e saj, Massimiliano dhe Martina janë plagosur. Ata i kishin mbijetuar edhe tërmetit të 2009- ës që goditi L'Aquila- n. Ezio Tulli, 42 vjeç, ishte zv. drejtor i policisë rrugore në Aprilia. Vdiq në Amatrice bashkë me dy fëmijët e tij, 14 dhe 12 vjeç. Arianna Masciarelli, 15 vjeçe, kishte shkuar në Pescara del Tronto për të kaluar pushimet te gjyshërit e saj. Ajo priste të niste studimet në liceun artistik të Pome- zia- s, në provincë të Romës, aty ku jetonte. Fabrizio Trabalza, 45 vjeç dhe Paola Rascelli, 43 vjeç, humbën jetën në shtëpinë e tyre në Amatrice. Fabrizio ishte webmaster i organizatës "Acti- Roma". Alessandro Neroni, 42 vjeç, punonte si parukier në Civitanova Marche. Vdiq në Amatrice, nën rrënoja, në shtëpinë e prindërve të tij. Nadia Magnanti, 44 vjeçe, vdiq bashkë me djalin e saj Lorenzo, në shtëpinë e tyre në Amatrice. Bashkëshorti i saj shpëtoi mrekullisht. Tiziana Lo Presti, 60 vjeçe, ishte funksionare e Mbrojtjes Civile. Ajo vdiq në Saletta, zonë e Amatrice- s, ku kishte shkuar për t'i qëndruar pranë nënës së saj, e cila ishte shtruar në spital. Tiziana humbi jetën, ndërsa nëna e saj shpëtoi.
Pas ngjarjes tragjike, ka nisur edhe një hetim nga ana e prokurorisë. Një tërmet gjyqësor me origjinë nga tërmeti i vërtetë: Është ky termi që po përdoret për hetimet e prokurorisë, për shkatërrim të qëllimshëm pas tërmetit. Një hetim i cili sipas të gjitha gjasave do të flasë për përdorimin e fondeve publike të ndara për ndërtesa publike dhe private, por që nuk janë shpenzuar. Nuk është vetëm shkolla "Romulus Capranica", e rinovuar në vitin 2012, e cila u shemb si një kështjellë rëre. Është edhe spitali, për të cilin ishin gati dy milionë euro, por që kurrë nuk u restaurua. Edhe bashkia e qytetit, gjithashtu u shemb, fondet në dispozicion ishin gati, edhe pse u shmangën për
diçka tjetër. Sipas prokurorisë janë disa raste, të cilat do të marrin zgjidhje vetëm pas hetimit. Pas tërmetit në L'Aquila në vitin 2009, qeveria italiane, në bashkëpunim me Mbrojtjen Civile, ka vënë në dispozicion 965 milionë euro për restaurimin e ndërtesave publike sipas rregullave antisizmike. Fondi parashikonte nga dyqind euro për metër katror për rinovimin e ndërtimit të qendrave historike, sidomos atyre që janë më në rrezik. Megjithatë shumë nga këto fonde nuk janë kërkuar, edhe për shkak të burokracisë. Midis Accumoli- t dhe Amatrice- s, ku rreziku sizmik ishte gjithashtu i lartë ( dhe të gjithë e dinin atë), nuk është shpenzuar asnjë euro, nga katër milionë të akorduara për vitin 2015- 2016.