Nikolla: Vendosëm raport të ri publik- privat në arsim

"Nuk janë zgjatur regjistrimet në universitet"

Gjatë

takimit me pedagogët, ministrja e Arsimit është ndalur më shumë te reforma e arsimit të lartë, e cila sipas saj u dha përgjigjen e merituar skeptikëve të saj. Nikolla ka theksuar se reforma në fjalë dëboi format e ilegalitetit, që sipas saj kishin përfshirë sektorin e arsimit gjatë qeverisjes së kaluar, duke iu dhënë më shumë autonomi universiteteve. "Sot u japim përgjigje të gjithë skeptikëve që kundërshtuan reformën në arsim, që sipas tyre do të sillte diktatin ndaj arsimit etj. Çdo ditë po bien këto argumente të ngritura mbi paragjykime. Ky vit i ri akademik fillon me një autonomi më të madhe të universitetit dhe kuotat e studentëve të përcaktuara nga departamentet. Është e njëjta skemë që po zbatohet në universitetet europiane", - ka saktësuar Nikolla. Më tej ajo ka denoncuar situatën e krijuar në arsim gjatë qeverisjes së kaluar për shkak të depërtimit të sektorit privat, një situatë që sipas saj kishte arritur "në kufijtë e paradoksit". "Ndërsa sot kemi një raport të ri publik- privat", - ka vijuar Nikolla. Ajo ka shtuar gjithashtu se, 90 për qind e akreditimeve ishin në parregullsi dhe me pasoja financiare për familjet shqiptare. "Ishte një akreditim që përfundonte brenda 3 ditëve. Sot bordi i akreditimit nuk drejtohet nga këshilltari i kryeministrit", - ka shtuar Nikolla. Po ashtu, ministrja foli edhe për pranimet në universitet, pasi ende vijojnë regjistrimet e studentëve fitues nga ulja e vijës së kuqe, duke lakuar gjatë fjalës së saj edhe emrin e dekanit të Ekonomikut, Dhori Kule, pasi ai ka deklaruar për "GSH" pak ditë më parë, se po bie cilësia e studentëve që po regjistrohen, pasi nga tejzgjatja e procedurave të regjistrimeve, një kategori studentësh të mirë i ka ikur Universitetit të Tiranës, dhe veçanërisht Fakultetit të Ekonomisë. "Procedurat e regjistrimit nuk janë zgjatur më shumë sesa vitet e mëparshme, për të mos thënë se koha është ulur, pasi më parë regjistrimet vijonin deri në nëntor. Ju e dinë këtë gjë, besoj se e di edhe Dhori Kule", - tha ministrja Nikolla. Sa i përket cilësisë së maturantëve, ajo e ka hedhur poshtë argumentin e dekanit të Ekonomisë, duke thënë se kjo nuk është e vërtet, pasi edhe me formulën e mëparshme kjo cilësi studentësh do ishte.