"Mbetjet", dekreti i Nishanit futet në kalendarin e punës deri më 24 dhjetor
Ricikluesit protestojnë para Kryesisë së Kuvendit: Miratoni ligjin
Dekreti
i presidentit për ligjin e mbetjeve pritet të diskutohet deri më 24 dhjetor në Kuvend. Dekreti është futur në kalendarin e punimeve 3- javore të Kuvendit, që nis nga data 30 nëntor deri më 24 dhjetor, kur mbyllet edhe sesioni i dimrit i Kuvendit. Në faqen e Kuvendit thuhet se ndër çështjet që do të shqyrtohen në Kuvendin e Shqipërisë mes të tjerave është edhe "dekreti nr. 9765, datë 14.10.2016, "Për kthimin e ligjit nr. 92/ 2016 "Për disa shtesa dhe ndryshime në ligjin nr. 10463, datë 22.09.2011, "Për menaxhimin e integruar të mbetjeve", të ndryshuar". Ligji fillimisht do të rikthehet në Komisionin për Veprimtaritë Prodhuese, Tregtinë dhe Mjedisin si komisioni përgjegjës. Ligji për menaxhimin e integruar të mbetjeve u kthye nga Presidenti i Republikës me argumentin se bie ndesh me Kushtetutën e Shqipërisë dhe konventën ndërkombëtare të ratifikuar nga vendi. Mazhorancës i duhet të sigurojë 71 vota për ta rrëzuar ose jo dekretin e kreut të shtetit. Ndërkohë dje, Shoqata e Ricikluesve ka zhvil- luar një protestë para Kryesisë së Kuvendit duke kërkuar miratimin e ligjit për importin e mbetjeve, pas kthimit nga presidenti. Importuesit me pankarta në duar kanë kërkuar që ligji të miratohet sa më shpejt, pasi sipas tyre po bëhet pazar elektoral me një të drejtë kushtetuese për përpunimin e lëndëve të para. Njëri nga pjesëtarët e Shoqatës së Importuesve, Bardhyl Balteza u shpreh: "Pa industri riciklimi nuk ka Shqipëri të pastër. Nuk do të importojmë plehra, por lëndë të parë. Mbetjet nuk janë plehra".