Prokurori i Leçes: Trafiku i drogës është rritur
Motta në Shqipëri, takohet me Llallën, Çakon dhe Tahirin, vlerëson bashkëpunimin mes dy policive Cataldo Motta: Ka shumë trafik narkotikësh nga Shqipëria
Cataldo Motta, prokurori i Antima fias në Leçe, ka zhvilluar dy ditët e fundit një takim me Prokurorin e Përgjithshëm, Adriatik Llalla, shefin e Prokurorisë për Krimeve të Rënda, Besim Hajdarmataj dhe një grup prokurorësh, si dhe me ministrin e Brendshëm, Saimir Tahiri dhe kreun e Policisë së Shtetit, Haki Çako. Në fokus të bisedimeve mes tyre ishte bashkëpunimi në luftën kundër trafikimit të lëndëve narkotike. Pas takimit të gjatë që Motta zhvilloi me Prokurorin e Përgjithshëm, në një prononcim për mediat tha se trafiku i drogës nga Shqipëria drejt Italisë është rritur, dhe për këtë fakt është i domosdoshëm një bashkëpunim më intensiv ndërkombëtar. "Situata është e tillë që është i nevojshëm një lloj bashkëpunimi më intensiv se në të kaluarën, sepse është rritur trafiku që vjen nga Shqipëria ashtu edhe nga rajonet e tjera". Gjithashtu, prokurori i Antimafias në Leçe tha gjatë fjalës së tij se nga prokuroria shqiptare ka gjetur një gatishmëri të plotë. "Kemi gjetur një gatishmëri të plotë nga autoritetet shqiptare. Prokurori i Krimeve të Rënda na siguroi bashkëpunimin e domosdoshëm. Sepse unë besoj te bashkëpunimi ndërkombëtar", - theksoi ai. Ndërsa, i pyetur në lidhje me hetimet ndaj pilotit italian Guido Guidi, avioni i të cilit u rrëzua në një pistë të
improvizuar në Ishëm, Cataldo Motta tha: "Kemi bërë një verifikim të hetimeve që kemi në duar dhe kemi përforcuar marrëveshjet mes nesh, pikërisht në kuadër të bashkëpunimit ndërkombëtar. Nuk kemi diskutuar për çështjen në fjalë dhe për
hetimet në vazhdim nuk mund të flas".
TAKIMET
Cataldo Motta dhe zv. prokurori i Republikës, Guglielmo Cataldi patën një takim edhe me ministrin e Brendshëm, Saimir Tahiri. Gjatë takimit u vlerësua
bashkëpunimi i deritanishëm mes autoriteteve ligjzbatuese në të dyja vendet, si dhe nevoja e zgjerimit dhe intensifikimit të këtij bashkëpunimi. Prokurori i Antimafias vlerësoi se bashkëpunimi ka qenë i frytshëm dhe veçoi vullnetin e qever-
isë shqiptare për të luftuar fenomenet kriminale. "Kemi ardhur në Shqipëri sepse ka bashkëpunim, ndryshe nuk do të vinim", - ka thënë gjatë takimit prokurori Motta. Ai evidentoi në takim nevojën për një bashkëpunim mes palëve, përmes veprimeve hetimore të përbashkëta. Ndërsa, ministri Tahiri është shprehur se Policia e Shtetit është e gatshme për çdo nismë të përbashkët për hetime kundër trafikut të drogës. Bashkëbiseduesit kanë theksuar gjatë takimit se prezenca e policisë italiane, përmes misioneve të saj në Shqipëri, është një dëshmi e fortë e bashkëpunimit dhe garanci për transparencë. Palët nënvizuan gjithashtu, se një kontroll efikas i kufijve kontribuon për të parandaluar paligjshmëritë. Vlerësim
bashkëpunimi mjaft të mirë mes dy agjencive si dhe me autoritetet e drejtësisë italiane u bashkëbisedua edhe me drejtorin e Policisë së Shtetit, Haki Çako. Ky i fundit theksoi angazhimin dhe përpjekjet e policisë shqiptare në parandalimin e kultivimit dhe të trafikimit të lëndëve narkotike. "Monitorimi nga ajri i Guardia Di Finanza- s pa limit kohor e në të gjithë territorin e vendit, dhjetëra operacione antitrafik të përbashkëta të Policisë së Shtetit me Policinë italiane tregojnë qartë për një bashkëpunim serioz e të besueshëm, duke arritur rezultate shumë të mira në këto drejtime", - është shprehur Çako gjatë takimit. Ndërsa, prokurori Motta evidentoi se "falë këtij bashkëpunimi mjaft të suksesshëm jemi sot këtu".