Kryeministri Renzi, në prag të dorëheqjes
Në prag të referendumit italian për reformat parlamentare, kryeministri Matteo Renzi duket se po shkon gjithnjë e më pranë fundit të karrierës së tij politike, pas premtimit se do të dorëhiqet nëse më 4 dhjetor italianët do ta nxjerrin humbës në referendum. Kjo të paktën është ajo çfarë sugjerojnë sondazhet e fundit në shtetin fqinj, por shtohen këtu edhe protestat e mijëra italianeve kundër propozimit të Renzi- t për të ulur kompetencat e senatit dhe për t'i dhënë më shumë fuqi qeverisë qendrore. Megjithatë duhet thënë, se në rastet si Brexit apo zgjedhjet amerikane, sondazhet kanë dështuar plotësisht në parashikimet e tyre. Sakaq, kryeministri italian ka vijuar të lobojë në mbarë vendin për të marrë sa më shumë vota për atë që ai e quan ' shpëtimi i Italisë'.