Kammenos: Çamët, në anën e humbësve PDIU: Organizoi manovra provokative
Ministri grek i Mbrojtjes provokon në kufi me Shqipërinë
Ministri
grek i Mbrojtjes, Panos Ka mmenos ishte dje në kufi me Shqipërinë, për t'i përcjellë një mesazh të fortë Tiranës zyrtare. I pranishëm në garnizonin ushtarak kufitar në Molivdoskepasti, i veshur me uniformë ushtarake dhe jo me kostumin zyrtar u shpreh: "Greqia nuk mund të pranojë sfida dhe referenca që ndikojnë në historinë dhe të drejtën ndërkombëtare. Nga këtu dua të dërgoj një mesazh për të gjithë ata që guxojnë të sfidojnë traktatet ndërkombëtare dhe të drejtën ndërkombëtare për të bërë deklarata provokuese. Përgjigja e jona është e qartë, Greqia është e vendosur të mbrojë sovranitetin kombëtar të vendit dhe të respektojë të drejtën ndërkombëtare", deklaroi ministri grek. Më tej e ka sqaruar se e kishte fjalën për deklaratat e fundit të kryeministrit shqiptar, Edi Rama, "për sajesat antihistorike që ai flet e që na sjellin përsëri në kujtesën bashkëpunëtorët e nazizmit. Ishin ata që dolën në anën e humbësve. Ata ishin në anën e mundur në luftë", tha ai. Për këtë reagoi dje, PDIU. Në një deklaratë të saj, partia e çamëve u shpreh: "Kamenos, kryetar i një partie të njohur për ekstremizmin, qëndrimet antisemite, antieuropiane, që konsideron udhëheqësit e Gjermanisë së sotme si neonazistë, tani konsideron çamët pa dallim si bashkëpunëtorë të nazistëve. Historinë dhe të drejtën ndërkombëtare e ka infektuar Greqia nëpërmjet manipulimit të saj dhe gjenocidit ndaj komunitetit çam. Shqipëria duhet të mbajë qëndrime të prera ndaj këtij ministri".