Burg për Aldi Lleshajn, plagosi efektivin pasi vodhi me armë një makinë në Laç
I riu u plagos teksa shkëmbente zjarr me policinë Seanca ndaj tij u zhvillua në spital
Aldi Lleshaj, i cili tentoi të vriste efektivin e policisë, Nikolin Gjergji pasi grabiti me armë një automjet në Laç, u njoh dje me masën e sigurisë “arrest me burg”. Lleshaj ndodhet i shtruar në Spitalin e Traumës, pasi gjatë ndjekjes nga policia mbeti i plagosur në këmbë. Gjykatësi i gatshëm i Krimeve të Rënda i komunikoi të dyshuarit akuzat e “Vrasjes së punonjësit të policisë”, në tentativë, “Vjedhjes me armë”, si edhe “Armëmbajtjes pa leje”. Aldi Lleshaj është një personazh i njohur për policinë për shkak të precedentëve kriminalë, nuk ka pranuar të japë shpjegime për ngjarjen e rëndë.
HETIMI I PROKURORISË
Nga hetimet ka rezultuar se në datë 22.12.2016, rreth orës 08: 45 në lagjen nr. 3 të qytetit Laç/ Kurbin, në kryqëzim të rrugëve, pranë një karburanti, Aldi Lleshaj i cili kishte një armë pistoletë ( pa leje) i doli para në rrugë shtetasit M. K., që po drejtonte automjetin tip “Porsche Cayenne” ( ngjyrë e zezë). Makina ka qenë në ecje. Tentativës së pronarit të makinës për të mos e dorëzuar atë, Lleshaj iu kundërpërgjigj me armë. Pasi mori makinën, Aldi Lleshaj mori drejtimin e automjetit dhe po largohej me shpejtësi në drejtim të kryqëzimit të Patokut. Në ndjekje të tij u vu patrulla policie dhe policë me furgonin e policisë me targë MB xxxx AA. Forcat e policisë arritën dhe e panë automjetin “Porsche” tek po dilte nga rruga e fshatit Adriatik, për në kryqëzim të Mamurrasit, në autostradë. Forcat e policisë i dolën përpara automjetit “Porsche” rreth 30 metra pa dalë në autostradë dhe qëndruan në një largësi rreth 4- 5 metra larg tij. Policia vuri re se në automjet nuk kishte persona të tjerë veç drejtuesit të mjetit dhe i bënë thirrje atij të zbriste nga makina. Ata panë se i riu me dorë të majtë nxori nga jashtë xhamit të automjetit armën dhe ua drejtoi atyre. Pas kësaj, ai hapi pak derën e automjetit dhe me armë drejtuar policëve, zbriti nga mjeti dhe doli nga pas tij nga ku qëlloi në drejtim të policisë. Nga e shtëna me armë nga ana e Lleshajt, u plagos drejtuesi i mjetit të policisë, Nikolin Gjergji. Ky i fundit u godit në kokë, anës syrit të djathtë. Në këtë moment ka pasur të shtëna nga të dyja palët. Pas disa të shtënave, Aldi Lleshaj u largua me vrap nga pas makinës, duke i ikur policisë përreth 3 km. Disa nga punonjësit e policisë e ndoqën atë në këmbë. Të tjerë u përpoqën t’i jepnin ndihmën e parë kolegut të tyre të plagosur. Nga ndjekja që iu bë Aldi Lleshaj, gjatë largimit të tij me vrap, ai kthehej me trup, u drejtonte armën policëve dhe qëllonte nganjëherë drejt tyre. Më pasi, ai u fut nëpër ca ara dhe këtu në ndihmë të policisë erdhën edhe forca të Repartit RENEA. Në moment u bë rrethimi i tij në një largësi të caktuar. Aldi Lleshaj vazhdonte të mbante armën në dorë, madje edhe qëllonte. Pas thirrjeve të vazhdueshme të policisë për t’u dorëzuar, pas rreth një ore ndërsa edhe shkëmbeu zjarr me policinë, ai u plagos në këmbë dhe menjëherë pas kësaj përfundoi në pranga, ndërsa iu sekuestrua edhe pistoleta. Pas kësaj, ai u identifikua se ishte banor i fshatit Adriatik/ Kurbin dhe se jetonte vetëm me të ëmën, pasi një vëlla e kishte jashtë shtetit, në Itali. Ai u dërgua në spital për t’i dhënë ndihmën mjekësore. Gjatë marrjes në pyetje, Aldi Lleshaj nuk pranoi të jepte shpjegime për ngjarjen e verifikuar. Aldi Lleshaj vazhdonte të mbante armën në dorë, madje edhe qëllonte. Pas thirrjeve të vazhdueshme të policisë për t’u dorëzuar, pas rreth një ore ndërsa edhe shkëmbeu zjarr me policinë, ai u plagos në këmbë dhe menjëherë pas kësaj përfundoi në pranga, ndërsa iu sekuestrua edhe pistoleta.