A rrezikohet Shqipëria nga taktikat e reja të ISIS- it?

Logjika e akteve terroriste të udhëzuara nga ISIS

Logjika e përdorur nga ISIS- i përgjatë 4 viteve të pasthemelimit të tij, me tërë baterinë e mjeteve të medias së tij, ka qenë fillimisht për të informuar/ indoktrinuar pasuesit, mbështetësit, simpatizantët, por jo vetëm ata, për fitoret ushtarake të tij në fushëbetejat në Irak, Siri dhe Libi. Ndërsa aktualisht, edhe për ta bërë anëtarësimin në ISIS, sa më tërheqës dhe premtues për rekrutime të reja.

Një revistë e re e quajtur “Rumiyah”, që është një version më i shkurtër i “Dabig”, revista zyrtare e ISIS- it, ka filluar të botohet veç dy muaj më parë në gjuhë të ndryshme, duke nxitur fuqishëm pasuesit për të kryer sulme terroriste në BE dhe SHBA.

Logjistika e akteve terroriste të udhëzuara nga ISIS

Nga ana tjetër, propaganda e ISIS- it është fokusuar në thjeshtësimin e logjis- tikave dhe mënyrave se si mund të kryhen aktet terroriste. U mëson pasuesve të tij se, nuk kanë nevojë për armë të sofistikuara, por të thjeshta e shumë të efektshme. Si p. sh., të kryejnë sulme me thikë sepse – sipas tij - thikat janë armë, relativisht të lehta për t’u fshehur dhe përdorur. Të përdorin automjete dhe të vrasin sa më shumë njerëz të pafajshëm.

Por, cilët janë ekzekutorët e këtyre taktikave të reja terroriste në Evropë?

Jo më shumë se një muaj më parë, Qendra Evropiane Kundër Terrorizmit ( EUROPOL- s European Counter Terrorism Centre) kumtonte në analizën e saj të rrezikut terrorist se “sidomos të kthyerit nga lufta e tyre xhihadiste në Lindje të Mesme, nën udhëzimet dhe urdhrat e drejtpërdrejtë të udhëheqjes së ISIS- it, janë duke planifikuar akte terrori në BE”.

Faktet tregojnë se edhe islamistë integristë që je- tojnë e banojnë në hapësirën evropiane, dhe/ ose azilkërkues në BE, të njohur tashmë në fjalorin e luftës antiterror si “ujqërit e vetmuar”, të vetëindoktrinuar sidomos nga propaganda xhihadiste me anë të internetit, që nuk janë në radarin e shërbimeve të sigurisë, mund të godasin ku e kur nuk e pret.

Edhe terroristë të ardhur me refugjatët janë një kontingjent mjaft i rrezikshëm potencial i akteve terroriste. Sjellin përvojat luftarake, reflekset e shmangies së dedektimit të tyre prej agjencive inteligjente.

Sipas burimeve të hapura të EUROPOL- it, mendohet se ISIS- i ka krijuar njësinë e planifikimit dhe realizimit të akteve terroriste në BE dhe se prej dy vjetësh ka dërguar elementë të tij, me rrugë legale dhe ilegale në shtete të BE- së.

Përse- të dhe objektivat e ISIS- it për akte terroriste ndaj civilëve në Evropë, ndoshta edhe në Ballkan

Me fillimin e humbjeve të territoreve të mëdha në Siri, Irak dhe Libi, me presionin në rritje të avancimit ushtarak, policor dhe inteligjencës perëndimore në këto vende, por edhe në Afrikë, me shterimin e burimeve financiare, udhëheqja e ISIS- it ka vendosur për taktika multidimensionale në shërbim të një strategjie më të gjerë diversioni dhe destabiliteti në vendet e angazhuara kundër tij.

Taktika kryesore është të drejtojë, organizojë, inkurajojë pasuesit e saj, për të kryer sulme kundër civilëve, qafirëve “jobesimtarë” në Evropë dhe SHBA, sidomos ndaj shtetasve të vendeve pjesëmarrëse në koalicionin kundër ISIS- it, udhëhequr nga SHBA- të.

Për të shkaktuar viktima në masë, pa dallim kombësie dhe feje, në Evropë. Për të shfrytëzuar ankthin evropian të pranisë së miliona refugjatëve dhe frikës së pranisë së terroristëve të fshehur mes tyre. Për të dobë- suar solidaritetin dhe shpirtin evropian të mikpritjes së refugjatëve që kërkojnë strehë të sigurt në territorin e BE- së. Për të maksimizuar rritjen e së djathtës islamofobe evropiane, për të vënë edhe më shumë kufizime në numrin dhe të drejtat e refugjatëve me përkatësi myslimane, çka do të rezultonte në një përfitim të madh politik për ISIS- in. Ngaqë do të krijonte një ndjenjë të fortë armiqësie të Ummetit ( kombit mysliman) kundër Evropës dhe Perëndimit në përgjithësi. Për të detyruar shumë vende të fokusohen brenda vendit të tyre, duke e lënë ISIS- in të lirë në veprimet e tij në Lindje të Mesme.

Nuk besoj se bota demokratike euroatlantike do të bjerë në kurthin e objektivave të ISIS- it, por do të bëjë ndarjen e qartë mes myslimanëve në shumicë absolute qytetarë besnikë, paqësorë, bashkëjetues me rregullat dhe ligjet e shteteve evropiane ku jetojnë e qëndrojnë, dhe elementëve integristë dhe terroristë, kushdoqofshin dhe ngado që vijnë.

Por, a është Ballkani, Shqipëria, e përfshirë në hartën e taktikave të reja xhihadiste të akteve terroriste mbi civilë të pafajshëm, sidomos nga ana e “ujqërve të vetmuar radikalë” të ISIS- it?

Një pyetje që mendoj se, duhet analizuar dhe mbajtur në prioritetin absolut të shërbimeve të sigurisë të RSH. Por, mjafton të përmendim parandalimin e një goditjeje të mundshme terroriste gjatë ndeshjes së Kombëtareve të futbollit të RSH dhe Izraelit, për t’u bindur se ISIS- i ka vendosur të godasë jo vetëm fuqitë evropiane, por edhe vende të vogla si Shqipëria.

* Ish- Kryetar i Komitetit Shtetëror të Kulteve; ish- ambasador