Basha: Sauna dhe kinema. Rama: Gënjeshtra të ulëta
Buxheti 2017, kryeministri dhe kreu i opozitës shkëmbejnë akuza dhe e kundërakuza Kreu i PD: Në Kryeministri, restorant e sallë për konjak
Kryeministri Edi Rama dhe kreu i opozitës, Lulzim Basha përmes "Facebook"- ut shkëmbyen dje akuza e kundërakuza lidhur me buxhetin e vitit të ardhshëm. Z. Basha përmes një videoje në rrjetet sociale e akuzoi kryeministrin Edi Rama se 10 milionë euro të portofolit qeveritar i ka vendosur në dispozicion të qejfeve personale, duke investuar për objekte luksi dhe jo për nevojat e qytetarëve. Sipas kreut të PD- së, "restorant personal, sallë për konjak, kinema e sauna janë luksi i Ramës në kryeministri". Pak orë më vonë shefi i qeverisë, Edi Rama shpërndau në faqen e tij në "Facebook" videon e Bashës, duke i cilësuar gënjeshtra akuzat e tij. Kryeministri shkruan se kur gënjeshtra i ka këmbët e gjata dhe fytyrën të mbuluar me maskën tallëse të pafytyrësisë, shumëkush e ngatërron gabimisht me politikën, por që sipas tij, ajo është pengmarrja e politikës me synimin e pushtetit që vjen si tallje me njerëzit përmes një loje të pacipë gënjeshtrash në mungesë të një vizioni, programi, lidershipi e skuadre. Rama teksa e shpërndau videon e Bashës në faqen e tij në "Facebook", e etiketoi si gënjeshtër dhe madje pengmarrje të politikës, me qëllimin e ulët të pushtetit. "Kur gënjeshtra i ka këmbët e gjata dhe fytyrën mbuluar me maskën tallëse të pafytyrësisë, shumëkush e ngatërron gabimisht me politikën. Në fakt, është vetëm pengmarrja e politikës për qëllimin më të ulët, synimin e pushtetit duke helmuar e çoroditur sa më shumë njerëz, në një përpjekje të harbuar për asgjësuar shpresën përmes asgjësimit të të vërteta- ve, shkatërrimit të provave, zhdukjes së fakteve! Ja një shembull fantastik i politikës si tallje me njerëzit, si shprehje ekstreme e vulgaritetit, si lojë e pacipë gënjeshtrash në mungesë të një vizioni, programi, lidershipi e skuadre, që duhet t'u ofronte shqiptarëve alternativën e opozitës për ta bërë më të mirë atdheun e përbashkët…", shkruan Rama. Më herët kryedemokrati Lulzim Basha publikoi një video në faqen e tij zyrtare në "Face- book", ku pretendohet se kryeministri Edi Rama do të shpenzojë 10 mln euro vitin e ardhshëm për luksin e tij. Sipas Bashës, në godinën e Kryeministrisë do të ketë, restorant, bar personal, por edhe salla të veçanta për masazh e fizioterapi. "10 mln euro do të harxhojë kryeministri Rama në vitin 2017 për luksin e tij. Këto para do të financojnë luksin dhe argëtimin në godinën e Kryeministrisë. Një restorant personal, një bar personal, një sallë për konjak dhe puro, një sallë masazhi dhe fizioterapie, një sallë kinemaje, një sallë ekspozitash, një sallë basketbolli. Buxheti 2017 për qejfin e kryeministrit, jo për hallet e njerëzve", thuhet në videon e shpërndarë nga kreu demokrat, Lulzim Basha.