Ish- kryebashkiaku Fatmir Guda: Maskat më zunë pritë afër shtëpisë dhe më kërcënuan me armë në kokë"
"Nëse mund t'i shpëtosh prokurorisë, s'i shpëtoni plumbit"
LESKOVIK - Një ngjarje e rëndë është regjistruar pasditen e djeshme në Leskovik, ku dy persona ende të paidentifikuar kanë kërcënuar me pistoletë në kokë, ishkryetarin e Bashkisë së Leskovikut, Fatmir Guda. Pas ngjarjes, Guda që mban edhe postin e nënkryetarit të PD- së së Kolonjës dhe anëtar i këshillit bashkiak, tha se 2 persona me maska i janë afruar dhe i kanë vendosur pistoletën në kokë. Ndërkohë, ai bëri me dije se ka bërë edhe denoncim në polici. Në një intervistë për "Balkanweb" nga ambientet e komisariatit të Leskovikut, Guda pohoi se kanë qenë dy persona të armatosur dhe maskuar që i kanë zënë ' pritë' 30 m afër shtëpisë, duke e kërcënuar me jetë. Ndërkohë, ish- kryebashkiaku tha se kjo nuk është hera e parë që merr shantazhe, duke shtuar se ka frikë për fatin e familjarëve të tij. Po ashtu, Guda shtoi se nuk ka besim tek strukturat e policisë, pasi ato sipas tij s'i kanë ofruar asnjë mbështetje deri më tani.
Zoti Guda, mund të na thoni se kur ndodhi ngjarja?
Ditën e sotme ( djeshme), rreth orës 17: 10 dy persona të maskuar dhe armatosur më janë afruar. Isha 30 m larg shtëpisë, por rruga ishte e pandriçuar, ishte errësirë. Njëri prej tyre mu afrua dhe më foli, ndërsa tjetri ishte pasiv. Ruante territorin. Çfarë ju thanë? Vetëm njëri prej tyre foli. Më vuri pistoletën tek koka e më tha: "Nëse mund t'i shpëtosh prokurorisë, s'mund t'i shpëtoni plumbit. Ndaj, mos e hap shumë gojën". Për veten nuk kam frikë, por kam frikë për familjen time. U rrezikohet jeta.
Keni marrë kërcënime më parë?
Po. Ky nuk është kërcënimi i parë. Më datën 20 nëntor, ditën kur u mbajtën zgjedhjet për kryetar bashkie në Kolonjë u kërcënova nga per- sona të armatosur e maskuar. Gjithçka bëhet që unë të mbyll gojën, pas hetimeve të prokurorisë. Unë jam nënkryetari i PD- së së Kolonjës dhe anëtar i këshillit bashkiak.
Keni dyshime se kush mund të fshihet pas këtyre kërcënimeve?
Nuk di të jap asnjë lloj shpjegimi.
A jeni vënë në mbrojtje nga strukturat e policisë?
Deri më tani nuk më është ofruar asnjë lloj mbrojtjeje nga policia. Edhe kur denoncova herën e parë, asgjë nuk u bë. Personat ende janë të paidentifikuar. Unë aktualisht jam në polici dhe s'e di nëse do më marrin në mbrojtje apo jo. Jam në pritje, shpresoj që kjo të marrë fund.