Lejet, procedurat dhe dokumentet për të ndërtuar shtëpi dhe shtesa

Aplikimi për leje ndërtimi, pranë njësive të qeverisjes vendore Afati për shqyrtimin e kërkesës deri në pajisjen me leje, 35 ditë

Personat që duan të ndërtojnë shtëpi të re, shtesë ose të shembin shtëpinë e vjetër për të ndërtuar një të re, duhet të aplikojnë në portalin “e- albania” për t’u pajisur me leje. Ministria e Zhvillimit Urban ka publikuar të gjithë dokumentacionin e nevojshëm për të gjitha kategoritë e lejeve, nga shtesat deri te ndërtimet me shumë kate. Në bazë të ligjit nr. 107/ 2014, “Për Planifikimin dhe Zhvillimin e Territorit”, i ndryshuar, dhe akteve nënligjore në zbatim të tij, kryetari i bashkisë është përgjegjës për vendimmarrjen lidhur me aplikimet për lejet e ndërtimit në territorin administrativ të bashkisë. Me shërbimin me një ndalesë dhe procedura të thjeshtuara, transparente dhe të shpejta, reduktohen pengesat administrative dhe përmirësohen praktikat e aplikimit për lejet përkatëse.

SPORTELI

Sporteli i shërbimit me një ndalesë për veprimtaritë ndërtimore, kujdeset për të gjitha marrëdhëniet ndërmjet palës së interesuar, autoritetit vendor të planifikimit dhe organeve të tjera të administratës publike që kanë detyrimin të japin mendimin e tyre në lidhje me punimet, objekt i kërkesës për leje ndërtimi apo deklaratës për punime paraprake. Ky shërbim përbën pikën e vetme të kontaktit të palës së interesuar me administratën publike në lidhje me kërkesën për leje dhe ndërhyrjen përkatëse në territor.

AFATI

Pas dorëzimit të të gjithë dokumentacionit, brenda 5 ditësh duhet të përfundojë shqyrtimi formal. Brenda 10 ditësh nga përgjigjet e institucioneve, duhet të përfundojë shqyrtimi teknik. Kryetari i njësisë së qeverisjes vendore merr vendim dhe njoftohet aplikuesi. Brenda 15 ditësh nga njoftimi, paguhet taksa e infrastrukturës. Më pas, brenda 5 ditëve lëshohet leja.

DOKUMENTET

Sipas legjislacionit në fuqi, pala e interesuar, ndërtuesi, subjekti individ ose subjekt duhet të paraqesë kërkesën për leje ndërtimi, sipas formularit të aplikimit, të përcaktuar në sistemin elektronik të lejeve. Në dosje duhet të jenë dokumente që vërtetojnë të drejtat pasurore të pronës/ pronave që merr/ marrin pjesë në një zhvillim, përfshirë marrëveshjet midis pronarëve dhe zhvilluesit ose/ dhe palëve të treta dhe plani i vendosjes së ndërtimit mbi fragmentin e hartës në gjendjen ekzistuese. Janë të detyrueshme, projekti i ndërtimit dhe relacioni përkatës dhe grafiku paraprak i punimeve dhe afati i dorëz- imit të objekteve, sipas fazave të zbatimit. Aplikanti për leje duhet të ketë një preventiv dhe duhet të dorëzojë deklaratat e projektuesit të licencuar, sipas formatit të aplikimit, të përcaktuar në sistemin elektronik të lejeve të ndërtimit, nëpërmjet së cilës konfirmohet përputhshmëria e projektit me lejen e zhvillimit, dokumentet e planifikimit e kontrollit të zhvillimit, në fuqi, dhe me legjislacionin që rregullon veprimtarinë e ndërtimit në Republikën e Shqipërisë, përfshirë dispozitat antisizmike, të sigurisë, mbrojtjes nga zjarri dhe ato higjieno- sanitare. Aplikanti duhet të ketë mandatpagesat e tarifave të aplikimit dhe kopje të policës së sigurimit të projektuesve, për mbulimin e përgjegjësive profesionale. ligj.

Kërkesat për leje ndërtimi paraqiten për shqyrtim nëpërmjet sistemit elektronik të lejeve, i cili mundëson edhe ngarkimin, lehtësisht, të dokumentacionit shoqërues të kërkesës për leje.

Autoriteti përgjegjës, brenda 5 ditëve nga paraqitja e tyre, shqyrton dokumentacionin e depozituar, për çështje të përmbushjes së formës dhe përputhshmërisë së projektit me lejen e zhvillimit/ dokumentet e planifikimit.

Nëse projekti nuk është në përputhje me lejen e zhvillimit/ dokumentet e planifikimit apo personi nuk legjitimohet për të paraqitur kërkesën, autoriteti përgjegjës merr vendim të arsyetuar për rrëzimin e kërkesës dhe njofton aplikuesin.

Nëse dokumentacioni është i plotë, njoftohet kërkuesi që të paguajë, brenda 15 ditëve, të gjitha tarifat për shqyrtimin e aplikimit nga autoritetet që duhet të shprehen në lidhje me kërkesën, në rast se autoriteti përgjegjës ka identifikuar të tilla.

Në rast të kundërt, autoriteti përgjegjës njofton kërkuesin që, brenda të njëjtit afat, të kryejë plotësimin e dokumentacionit dhe pagesën e tarifave të shërbimit, në rast se ka të tilla. Me dërgimin e njoftimeve, pezullohet llogaritja e afatit të shqyrtimit të kërkesës deri në plotësimin e dokumentacionit dhe/ ose pagesës së tarifave nga kërkuesi.

Nëse brenda afatit 5- ditor, nuk njoftohet kërkuesi për mangësi në dokumentacion apo për detyrimin e pagesës së tarifave, dokumentacioni konsiderohet i miratuar në heshtje dhe autoriteti përgjegjës është i detyruar të vijojë me shqyrtimin e kërkesës.

Në rast se dokumentacioni është i plotë dhe është kryer pagesa e të gjitha tarifave të shërbimit të institucioneve përgjegjëse, aplikimi konsiderohet i pranuar për shqyrtim të mëtejshëm.

Struktura përgjegjëse dërgon pranë autoriteteve përgjegjëse të identifikuara kërkesën për dhënien e informacionit, mendimeve, vendimeve, lejeve, licencave apo autorizimeve të nevojshme, të shoqëruar me mandatpagesën për shlyerjen e tarifave përkatëse të shërbimit. Në mungesë të përgjigjes, brenda afatit 10ditor, kërkesa konsiderohet e miratuar në heshtje dhe autoriteti përgjegjës ka detyrimin të vijojë me shqyrtimin e kërkesës për leje, ose në raste të veçanta 30 ditë ( sipas legjislacionit në fushën e trashëgimisë kulturore, monumentale apo arkeologjike).

MIRATIMI

Brenda 10 ditëve, nga marrja e të gjitha përgjigjeve prej autoriteteve publike të specializuara apo miratimit në heshtje, nga ana e tyre, autoriteti vendor përgjegjës përfundon shqyrtimin teknik të kërkesës dhe njofton kërkuesin për vendimmarrjen përkatëse.

Struktura përgjegjës e planifikimit, pranë autoritetit vendor, përgatit raportin e vlerësimit teknik dhe ia përcjell atë për vendimmarrje, nëpërmjet sistemit elektronik të lejeve, kryetarit të bashkisë. Raporti i vlerësimit teknik dhe rezultati i njoftohet aplikuesit.

Në përfundim të shqyrtimit teknik kryetari i bashkisë njofton aplikuesin, nëpërmjet sistemit elektronik të lejeve, lidhur me:

miratimin e kërkesës për leje ndërtimi dhe detyrimin për kryerjen e pagesës së taksës në infrastrukturë; refuzimin e lejes së ndërtimit. Brenda 15 ditëve nga marrja e njoftimit, nëpërmjet sistemit elektronik të lejeve, për miratimin e kërkesës për leje ndërtimi, kërkuesi duhet të ngarkojë në sistem aktet që provojnë pagimin e taksës së ndikimit në infrastrukturë nga ndërtimet e reja.

Autoriteti përgjegjës, brenda 5 ditëve nga përmbushja e depozitimit të aktit që provon pagimin e taksës së ndikimit në infrastrukturë, i dërgon aplikuesit, nëpërmjet sistemit elektronik, lejen e ndërtimit, të nënshkruar elektronikisht prej tij.

Në mungesë të depozitimit të aktit që provon përmbushjen e detyrimit të pagesës së taksës së ndikimit në infrastrukturë, autoriteti përgjegjës i dërgon aplikuesit, nëpërmjet sistemit elektronik, vendimin për refuzimin e lejes së ndërtimit.