Daja me sytë nga merkato: Të fortë, por dua përforcime

Trajneri i kampionëve pret Hamdi Salihimin në Turqi dhe do një grup sa më të plotë Një rumun, një kanadez dhe një nigerian në provë

Vetëm një ditë pas miqësores ndaj Bur sasporit që përfundoi në barazim pa gola, Skënderbeu iu rikthye stërvitjes duke zhvilluar seancën e radhës në Antalia të Turqisë, vendgrumbullim që është përzgjedhur nga drejtuesit e klubit korçar për të zhvilluar fazën përgatitore të dimrit. Këtë të hënë në Antalia me skuadrën u bashkua edhe sulmuesi i Hamdi Salihi, ndërkohë që në provë te Skënderbeu janë afruar tre futbollistë të rinj, rumuni Kornel Petresku si dhe dy 19- vjeçarët e talentuar, kanadezi Hanson Bokai dhe nigeriani Çarles. Trajneri Ilir Daja, i cili ka vetëm pak ditë që ka marrë drejtimin e kampionëve, është i kënaqur me grupin e futbollistëve që ka në dispozicion, por në një prononcim ekskluziv për "Supersport" nga Antalia, 50- vjeçari kryeqytetas nënvizoi se pret diçka edhe nga merkato. "Jam i kënaqur me përgatitjet duke filluar nga kushtet që janë optimale, është kompletuar edhe grupi me ardhjen e Salihit. Bëhet fjalë për një skuadër shumë të mirë, që ka fituar 6 tituj kampion radhazi. Por, natyrisht kemi nevojë për përforcime, pasi kampionati është i gjatë dhe duke pasur parasysh që objektivi ynë është titulli kampion, duhet një grup i kompletuar me 2 alternativa për çdo repart, sepse kampionati ka dhe skualifikime apo dëmtime". Ndaj Bursasporit, Skënderbeu zhvilloi miqësoren e parë në tokën turke. Një barazim 0- 0 ndaj një skuadre shumë të fortë të Superligës turke. Daja ka mbetur i kënaqur nga paraqitja e skuadrës së tij. "Në ndeshjen miqësore ndaj Bursasporit e kemi trajtuar në dy plane. Skuadra u paraqit mirë, më pëlqeu paraqitja e lojtarëve në aspektin individual, kjo edhe për faktin se bashkëpunuam mirë si skuadër. Disa lojtarë i njoh, pasi i kam stërvitur edhe vetë, por i kam pasur edhe kundërshtarë, por është tjetër gjë t'i stërvitësh vetë". Në Antalia kampionët e 6 viteve të fundit do të zhvillojnë edhe dy takime të tjera miqësore ndaj dy skuadrave azere, Sumqaiyt dhe Karabagut të Ansi Agollit. Në këto dy sfi- da, por edhe në vazhdimësinë e sezonit, objektivi i Dajës është që skuadra të përmirësohet në sulm. "Do të mundohem të zhvillojmë një futboll më sulmues, por për ta bërë diçka të tillë, lojtarët duhet të zbatojnë me përpikmëri detyrat e tyre sulmuese dhe ato mbrojtëse. Shpresojmë që me rifillimin e kampionatit, skuadra ta gjejë me më tepër lehtësi golin, po punojmë në këtë aspekt dhe mendoj se do t'ia arrimë qëllimit".