Dokle: Qeveria, më tepër vëmendje ndaj kuksianëve
Kryeministri mbledh Këshillin e Emergjencave: Situata është nën kontroll, gripi drejt largimit “Banorët e Borjes po i dalin zot vetes. Nuk e pranojnë izolimin”
Deputeti socialist, Namik Dokle kërkoi më shumë vëmendje nga qeveria për banorët e fshatit Borje të Kukësit. Në disa foto që ai publikoi dje në “Facebook”, këta banorë shfaqen të gjithë së bashku duke hapur me lopata rrugën e bllokuar nga bora. “Borjanët i dalin zot vetes… Në këtë dimër të acartë, bashkëfshatarët e mi në Borje të Kukësit i dolën zot vetes. Nuk e kanë duruar kurrë dhe nuk e pranojnë izolimin, ngado që të ketë ardhur ai! Para dy ditësh, burrat e këtij fshati u ngritën të gjithë dhe shpëtuan një grup elektricistësh të rrethuar nga ‘ vdekja e bardhë’. E kanë bërë këtë akt human dhjetëra herë, kurdo që dikush është përballur me të keqen dhe ka pasur nevojë për ndihmë”, shkroi dje Dokle. Më tej ai shprehet: “Shikojini këto foto, vetë hapin rrugët për të shkuar te njëri- tjetri dhe pastaj, të gjithë bashkë hapin rrugën drejt Prizrenit.( Kukësi është ‘ larg’ dhe me rrugë të bllokuara, ndërkohë që Kosova i ka hapur të gjitha rrugët e Gorës!). Por, bashkëfshatarët e mi të mirë nuk harrojnë të hapin edhe ‘ rrëshqitësen’ për fëmijë ( luzgallo e quajnë ata) dhe madje të bëjnë edhe ndonjë foto artistike nga ky dimër. E duan jetën me gjithçka që ajo u ofron! E pra, këta njerëz të mirë që e fitojnë jetën me duart dhe shpirtin e tyre të paepur, meritojnë shumë më tepër nga qeveria që votojnë!”, shkroi Dokle.
KËSHILLI
Ndërkohë dje, kryeministri Edi Rama deklaroi se bilanci i punës së këtyre ditëve për të përballuar situatën e rënduar nga gripi e bora është pozitiv. Në mbledhjen e Këshillit Kombëtar të Emergjencave, ministrat dhe drejtuesit e strukturave të
shtetit të angazhuara në përballimin e emergjencave civile kanë bërë një raport të situatës. “Nga reagimet e kryetarëve të bashkive, pa dallim, majtas apo djathtas dhe nga reagimet e qytetarëve kam mundur të konstatoj me shumë kënaqësi, që puna e tyre është e vlerësuar shumë lartë përsa i përket
përkushtimit dhe sakrificës”, u shpreh Rama, duke falënderuar punonjësit e OSHEE- së. Po ashtu, ai përgëzoi edhe Forcat e Armatosura. Një vlerësim maksimal Rama bëri për ministrin e Bujqësisë, Edmond Panariti. “Puna e Emergjencave Civile ka qenë dhe mbetet në lartësinë e duhur. Angazhi- mi i Ministrisë së Bujqësisë, që ka qenë maksimal përpara se të fillonte kjo situatë, për të garantuar të gjithë sistemin, pavarësisht se parashikimet e motit nuk flisnin për përmbytje, që kemi pasur më parë”, tha Rama. “Nëse do t’i referoheshim volumit të madh të pasojave të evituara, besoj që bilanci i deritanishëm është mjaft pozitiv. Në këtë zyrë kemi informacion të përditësuar çdo 60 minuta nga i gjithë territori. Informacioni flet për efikasitet dhe për një situatë që është nën kontroll, ashtu siç me sa duket edhe situata e rënduar me epideminë e gripit ësh- të drejt përmirësimit, që e tregon ulja e numrit të vizitave dhe shtrimet në spitale”, u shpreh kreu i qeverisë. Drejtori i Emergjencave Civile, Shemsi Prençi bëri me dije se rrugët nacionale janë të hapura, por reshjet do të vijojnë gjatë gjithë muajit. Kryeministri bëri thirrje që qytetarët të vendosin zinxhirët për të shmangur aksidentet. Në fund të mbledhjes, kryeministri tha se, “me kapërcimin e kësaj situate ashtu siç bëmë edhe për përmbytjet e fundit, do të ulemi përsëri për të folur, konkretisht për çfarë nuk ka funksionuar ashtu siç ne duam”.