Kufiri detar me Malin e Zi, Bushati: Do e diskutojmë
Shteti malazez i dërgon propozimin Shqipërisë, ministri i Jashtëm: Zgjidhje sipas fqinjësisë së mirë Përgjigjja për Daçiç: Politikë viktimizuese e teatrale
Shqipëria ka ende të pazgjidhur edhe kufirin detar me Malin e Zi, përveç atij me Greqinë. Çështja është në diskutim, sipas ministrit të Jashtëm të Shqipërisë, Ditmir Bushati. Ajo është diskutuar dje gjatë takimit që Bushati pati me homologun malazez, Sergjan Darmanoviç, në Tiranë. “Ne kemi marrë një propozim nga Mali i Zi për t’u përfshirë në këtë proces dhe jemi të gatshëm që në kohë të përshtatshme të ulemi dhe të fillojmë diskutimet, në mënyrë që kjo çështje të adresohet në përputhje jo thjesht me rregullat ndërkombëtare, por edhe me parimin e fqinjësisë së mirë”, - u shpreh dje ministri i Jashtëm shqiptar, Bushati, gjatë konferencës së përbashkët për shtyp me homologun malazez. Nga ana e tij, gjatë konferencës me Bushatin, ministri i Jashtëm malazez, Darmanoviç u ndal edhe te çështja e Demarkacionit, marrëveshje e mbetur pezull mes Malit të Zi dhe Kosovës. “Ne kemi bërë atë që na takon, jemi sjellë sipas kushteve të përcaktuara në marrëveshje dhe sipas rregullave ndërkombëtare për hartimin e Demarkacionit. Problemin ne e shohim më shumë si çështje të politikës së brendshme. Ne nuk e kemi kushtëzuar Kosovën; jemi treguar të duruar dhe do të vazhdojmë të presim që palët politike në Kuvendin e Kosovës të bien dakord mes tyre”, - tha Darmanoviç. Gjatë takimit, dy homologët ranë dakord edhe për fuqizimin dhe modernizimin e pikave kufitare. Bushati u pyet edhe për krijimin e komunës shqiptare të Tuzit, premtim i pambajtur nga pala malazeze. “Transformimi i Tuzit si një komunë në kuptimin e vërtetë të fjalës parashihet si një nga angazhimet e këtij koalicioni. Nuk kam çfarë të shtoj më tepër përveçse mbështetjes që vjen nga Tirana për këtë qëndrim të koalicionit aktual në Malin e Zi”, - tha ministri i Jashtëm shqiptar. Bushati u ktheu një përgjigje edhe deklaratave të ministrit të Jashtëm serb, Ivica Daçiç, se thelbi i politikës shqiptare është krimi kundër serbëve dhe se këto politika po nxisin, sipas tij, sulme ndaj ambasadave të Serbisë pas arrestimit të Ramush Haradinajt. “Përdorimi i viktimologjisë si metodë politike e kombinuar me teatralitet dhe agresivitet, në planin afatshkurtër mund të ketë efekte befasuese; në planin afatgjatë është kundërproduktive. Serbia të zbatojë vendimet e gjykatave ndërkombëtare për çështjen ‘ Haradinaj’”, - u shpreh Bushati në lidhje me këtë qëndrim të ministrit serb.
Ndërkohë, ministri i Punëve të Jashtme të Malit të Zi, Darmanoviç u prit edhe nga kreu i Kuvendit, Ilir Meta. Sipas njoftimit për shtyp, Meta u shpreh se si Shqipëria, ashtu edhe Mali i Zi kanë një destinacion të përbashkët, dhe theksoi se “stabiliteti i Malit të Zi është stabiliteti ynë dhe i shërben mbarëvajtjes së paqes në tërë rajonin e Ballkanit, ku të gjitha vendet duhet të punojnë më ngushtë me njëri- tjetrin”. Ministri i Punëve të Jashtme të Malit të Zi, Sergjan Darmanoviç shprehu mirënjohjen për mbështetjen e vazhdueshme të Shqipërisë. Në përfundim, z. Meta dhe z. Darmanoviç ndanë bindjen e përbashkët se forcimi i perspektivës euroatlantike të të gjitha vendeve tona fqinje u shërben paqes, sigurisë dhe stabilitetit të Evropës Juglindore, veçanërisht në këto momente të rëndësishme zhvillimesh globale.