Testimi i mësuesve, më 21 janar do hyjnë në provim 4300 kandidatë
Drejtoresha Gjini: Renditja përfundimtare, në bazë të shumës së pikëve të testimit dhe dosjes "Mësues për Shqipërinë", ja struktura e testit
Për t'u punësuar në sistemin arsimor parauniversitar, mësuesit duhet t'i nënshtrohen provimit në datë 21 janar 2017. Sipas drejtoreshës së Arsimit Parauniversitar në Ministri të Arsimit, Zamira Gjini në total janë 4300 mësues, të cilët kanë aplikuar për të hyrë në këtë testim. "Në datë 21 janar zhvillohet testimi, provimi me shkrim i mësuesve që dëshirojnë të punojnë në arsimin parauniversitar publik. Në të gjithë vendin në 13 drejtori arsimore janë regjistruar 4300 kandidatë që do t'i nënshtrohen këtij testimi. Provimi i këtyre mësuesve do të zhvillohet në 24 qendra të përcaktuara nga DAR/ ZA- të përkatëse", - theksoi Gjini. Sipas saj, pas testimit këtyre mësuesve do t'u shtohen edhe pikët që kanë marrë në dosje dhe më pas do bëhet renditja e tyre përfundimtare për çdo lëndë. Numrin më të madhe të aplikantëve e ka Drejtoria e Arsimore e Tiranës me 789 kandidatë. Ky testim do të zhvillohet në mbarë vendin në të njëjtin orar, kandidatët duhet të paraqiten rreth 30 minuta para orës së zhvillimit të provimit në vendin ky do kryhet testim, vend të cilin e kanë të përcaktuar tashmë nga të drejtoritë arsimore. Provimi nis në orën 10: 00 dhe përfundon në orën 12: 30. Testi në total do të ketë 70 pikë dhe është i ndarë në dy pjesë.
STRUKTURA E TESTIT
"Testimi i kandidatëve për ushtrimin e profesionit të mësuesit në sistemin arsimor parauniversitar do të zhvillohet më datën 21.01.2017, ora 10: 00- 12: 30, në mjediset e planifikuara nga drejtoritë arsimore rajonale. Në testimin për ushtrimin e profesionit të mësuesit kanë të drejtën të marrin pjesë: kandidatët që janë pranuar në fazën e parë të konkurrimit nëpërmjet vlerësimit të dosjes, fazë e cila zhvillohet në çdo njësi arsimore vendore ( DAR/ ZA). Kandidatët që kanë marrë pjesë në testime paraardhëse "Mësues për Shqipërinë" dhe dëshirojnë të përmirësojnë rezultatin e tyre", përcaktohet në shkresën e MAS. Testi që do t'i nënshtrohen mbi 4300 kandidatë ditën e shtunë më 21 janar ndahet në dy pjesë. Pjesa e parë përmban dokumentet zyrtare, që kanë të bëjnë me veprimtarinë e mësuesve, programet lëndore përkatëse, metodologjinë e mësimdhënies dhe të nxënit në përgjithësi dhe të lëndës, etikën dhe komunikimin e mësuesit në institucionit arsimor, aspekte të drejtshkrimit të gjuhës shqipe ( në tabelën bashkëngjitur gjeni 14 dokumentet zyrtare që duhet të kenë informacion mësuesit).
Pjesa e dytë përmban përmbajtjen shkencore të
lëndës sipas programit orientues përkatës. Vlerësimi i testeve kryhet në Tiranë nga komisione të vlerësimit të testeve. Vlerësuesit e testeve janë të trajnuar dhe certi-
fikuar nga IZHA. Komisioni vlerëson me pikë secilën nga dy pjesët e testit dhe veçon testet e dyshuara për kopjim. Pikët e kandidatit për secilën pjesë të testit vendosen në
krye të fletës dhe testi nënshkruhet nga të dy vlerësuesit. Vlerësimi përfundimtar i kandidatit bëhet me sistemin e 70 pikëve, i cili përbëhet nga pikët e pjesës së parë të testit ( 30 pikë) dhe nga pikët e pjesës së dytë të testit ( 40 pikë). Renditja përfundimtare për çdo profil/ lëndë bëhet sipas pikëve totale që nxirren nga shuma e pikëve të marra në vlerësimin e dosjes së aplikimit dhe pikëve të marra në testimin "Mësues për Shqipërinë 2016". Renditja fillon me kandidatin me më shumë pikë dhe vijon në rendin zbritës. Kandidati i cili në renditjen e përgjithshme sipas profilit/ lëndës është renditur me numrin më të madh të pikëve, ka të drejtën e zgjedhjes për vendet e lira të punës në institucionet arsimore në prezencë të komisionit të ngritur pranë Drejtorive/ Zyrave Arsimore Rajonale. Të gjithë kandidatët që kanë marrë pjesë në testimet e mëparshme "Mësues për Sh-
qipërinë" dhe nuk kanë mundur të jenë pjesë e sistemit arsimor, si dhe kanë vendosur të mbajnë pikët e fituara nga testimi i mëparshëm, aplikojnë nëpërmjet një shtojce të veçantë duke respektuar kërkesat e Udhëzimit Nr. 38. Këta kandidatë pas vlerësimit përfshihen në renditjen përfundimtare për profil/ lëndë në DAR- in përkatës. Faza e tretë e konkurrimit është zgjedhja e vendit të punës, ku përparësi i jepet kandidatit që ka grumbulluar numrin më të madh të pikëve. Kandidatët nuk mund të refuzojnë më shumë se tri vende pune të lira në tri njoftime të komisionit. Në rast se refuzojnë më shumë se tri, kandidatët hiqen nga lista e renditjes. "Çdo mësues që hyn në punë, bën një vit pune dhe pastaj e merr emërimin nga drejtori i shkollës, pasi të ketë marrë miratimin e prindërve dhe shërbimit psikosocial në shkollë", theksoi drejtoresha e Arsimit Parauniversitar në MAS, Zamira Gjini.