Kapet në Itali gomonia me 4 milionë euro drogë

"La Repubblica": Mjeti u pikas nga banorët, malli u braktis nga trafikantët 700 kg hashash, vinte nga Shqipëria

Të ftohtit nuk i ka ndaluar trafikantët e drogës në Adriatik. Mediat italiane shkruajnë se është zbuluar një tjetër rast i trafikut të drogës në Leçe, që mendohet se vinte nga Shqipëria.

"La Repubblica" shkruan se një gomone e fuqishme kaloi ngushticën e Otrantos mesnatën e së hënës duke u gdhirë e martë.

Trafikantët synonin bregdetin e San Foca, por gomonia u pikas nga disa banorë të cilët njoftuan më pas policinë.

Sipas "La Repubblica", trafikantët kishin fshehur në shkurre afër plazhit thasët me drogë, me një peshë 700 kg kanabis dhe vlerë 4 milionë euro. Nuk dihet nëse kjo sasi droge vinte nga Shqipëria, por autoritetet italiane kanë nisur hetimet për të identifikuar trafikantët. Alarmi për rritjen e trafikut të drogës nga Shqipëria në Pulia ka nisur në muajt e fundit nga shërbimet sekrete, të cilat gjithashtu kanë theksuar edhe rrezikun e radikalizmit islamik në Shqipëri.

Hashashi që eksportohet nga Shqipëria në Itali është shndërruar në një fenomen të zakonshëm prej vitesh. Vetëm pak javë më parë, policia Kufitare e Vlorës ka sekuestruar plot 1.2 ton kanabis. Operacioni u zhvillua nga toka dhe ajri për kapjen e trafikantëve, të cilët mendohet se u fshehën në pyll. Lënda narkotike u zbu- lua në Zvërnec, në plazhin midis Petroliferës dhe Triportit, nga shërbimet e Policisë Kufitare, ndërsa u bllokua një kamionçinë e markës "IVE- CO" e hapur nga mbrapa, brenda së cilës u konstatuan pako të mëdha të mbështjella të mbushura me kanabis.

Në afërsi të kamionçinës u gjet nga policia edhe mjeti fuoristradë tip "Toyota" me targa CA4816BY, ndërsa në det u pa një mjet lundrues, i cili lëvizi brenda Gjirit të Vlorës, ndërsa dyshohej se droga do trafikohej drejt Italisë.

Nga kontrolli i zonës nga policia, në pyll u konstatua edhe një karel ( transportues mjetesh lundruese), dhe në një distancë rreth 100 m nga kareli u gjet i braktisur një automjet tip "Land Rover". Menjëherë u njoftuan Policia Vlorë dhe Delta Forcë për kontrollin nga toka dhe deti për kapjen e mjetit lundrues.

Lënda narkotike dhe mjetet e gjetura në vendngjarje

Autoritetet shqiptare po shikojnë mundësinë e heqjes së dënimit për personat që konsiderohen si përdorues të kanabisit. Prej kohësh, të varurit nga kjo lëndë narkotike e kanë cilësuar të padrejtë faktin se ata kur kapen me sasi të vogla kanabisi dënohen njësoj si prodhuesit dhe trafikantët e drogave të ndryshme. Burime pranë grupit të ekspertëve ligjorë që po përgatisin propozimin për ndryshimet e Kodit Penal, thanë për TVSH se sasia për përdorim vetjak mendohet të jetë deri në 3 gramë. Propozimi i hedhur së fundmi erdhi nga ministri i Brendshëm, Saimir Tahiri. Por, krahas heqjes së dënimit për personat në varësi nga kanabisi, pritet ashpërsimi i dënimit për prodhuesit dhe trafikuesit e lëndëve narkotike. Çdo vit, rreth 250 përdorues të lëndëve narkotike dalin brenda një viti përpara gjykatës së Tiranës, ku marrin dënime të ndryshme si prodhues dhe shpërndarës të lëndëve narkotike. Të prekur nga ky përcaktim janë edhe minorenët, të cilët sipas psikologëve mbeten "viktimat" kryesore të përdorimit të kanabisit.