Bushati: Marrëveshjen e Ohrit nuk e negociojmë me asnjë zyrtar
Ministri i Jashtëm: Mbështesim faktorin shqiptar
Ministri
i Punëve të Jas htme, Ditmir Bushati u shpreh se, zbatimi i Marrëveshjes së Ohrit nuk mund të negociohet me asnjë zyrtar në Maqedoni. Në një intervistë për “TV ALSAT”, ministri Bushati u pyet nëse ka komunikuar me homologun maqedonas, Poposki. “Qëndrimi i Tiranës zyrtare është konstant. Për ne, respektimi dhe zbatimi i Marrëveshjes së Ohrit në germë dhe frymë nuk është një çështje që mund ta negociojmë me homologë apo zyrtarë në Maqedoni. Kemi lexuar edhe votën e elektoratit shqiptar në këtë prizëm. Qëndrimi i Tiranës është i qartë edhe në Organizatat Ndërkombëtare ku jemi prezentë dhe kërkojmë që Maqedonia gjithashtu të jetë prezente, si rasti i NATO- s. Për ne Marrëveshja e Ohrit është dhe një marrëveshje që ofron mundësinë për më shumë liri, barazi dhe demokraci në Maqedoni, koncepte që janë të lidhura me sigurinë, fqinjësinë e mirë dhe të ardhmen tonë të përbashkët euroatlantike”, - tha Bushati, duke folur për situatën në shte- tin fqinj. Sipas Bushatit, Maqedonia përcjell të njëjtat reagime si në rastin e platformës, sa herë që në skenë del Marrëveshja e Ohrit. “Ka një reagim të pashpjegueshëm të autoriteteve maqedonase, jo vetëm për këtë rast, por në përgjithësi, sa herë që përmendet Marrëveshja e Ohrit nga ana e Shqipërisë dhe sa herë përmendet Marrëveshja e Ohrit nga institucionet ndërkombëtare dhe partnerët ndërkombëtarë. Nuk e kuptoj pse merret me kaq sëkëlldi. Dihet mirë që Marrëveshja e Ohrit shpëtoi Maqedoninë nga kthetrat e një konflikti që do kishte pasur efekte shkatërrimtare për Maqedoninë dhe gjithë rajonin. Tendenca për të barazuar të drejtat e shqiptarëve në Maqedoni thjesht me krijimin e lehtësirave për ndërtimin e disa fabrikave apo zonave të lira ekonomike, në rastin më të mirë do ishte dritëshkurtësi dhe në rastin më të keq do barazonte shqiptarët me një komunitet punëtorësh që mund të jenë drejt kërkimit të punës”, - u shpreh ministri i Jashtëm. Si- pas tij, “Maqedonia është shtet i përbashkët i maqedonasve dhe shqiptarëve si dhe komuniteteve të tjera minoritare. Sa më shpejt të krijohen kushtet për ta njohur këtë fakt publikisht, besoj se do ketë shumë më tepër ura komunikimi dhe përfaqësim më të mirë në institucionet kryesore në Maqedoni, do ketë zbatim politikash zhvillimore më harmonike, më shumë stabilitet dhe fqinjësi të mirë”. Sa i përket rolit të Tiranës në platformën e përbashkët të partive shqiptare në Maqedoni, Bushati tha: “Shteti shqiptar nuk është përfshirë në çështje të brendshme të një vendi mik dhe vendi fqinj siç është Maqedonia. Shteti shqiptar dhe qeveria shqiptare ka zbatuar një detyrim kushtetues që ka të bëjë me mbrojtjen dhe avancimin e të drejtave të shqiptarëve pavarësisht se ku jetojnë”. “Tirana ka mbështetur dhe do vijojë të mbështesë përpjekjet e të gjithë faktorit politik shqiptar për të punuar së bashku për të mirën e shqiptarëve që jetojnë në Maqedoni”, - tha Bushati.