Meta e Vasili, në ceremoninë e Trump: Besojmë në bashkëpunim në rritje
Kreu i Kuvendit takon presidentin e Senatit: "Do ju kushtojmë vëmendje" "Angazhimi i SHBA, i rëndësishëm për sigurinë në rajon"
Kryetari i Kuvendit, Ilir Meta dhe kreu i grupit parlamentar të LSI- së, Petrit Vasili morën pjesë dje në ceremoninë e inaugurimit të Presidentit të ri të SHBA, Donald Trump. Të dy drejtuesit e LSI- së kanë qenë të ulur në këtë ceremoni, të ftuar nga zyrtarë të kongresit dhe senatit amerikan. Gjatë qëndrimit të tij në Uashington DC, kryetari i Kuvendit të Shqipërisë, Ilir Meta u prit nga presidenti i Senatit Amerikan, Orrin Hatch. Senatori Orrin Hatch i uroi mirëseardhjen në Uashington kryetarit të Kuvendit, Ilir Meta dhe shprehu kënaqësinë për pjesëmarrjen e tij në ceremoninë inauguruese të Presidentit 45- të të SHBA- ve, Donald Trump. Duke diskutuar mbi marrëdhëniet mes Shqipërisë dhe Shteteve të Bashkuara të Amerikës, senatori Hatch theksoi se administrata e re do t'i kushtojë vëmendje Shqipërisë dhe aleatëve të saj. "Kemi kënaqësinë që merrni pjesë në inaugurimin e presidentit Trump. Administrata e re do t'i kushtojë vëmendje Shqipërisë dhe aleatëve të saj. Në këtë kuadër duhet të rrisim bashkëpunimin në disa fusha si, siguria dhe tregtia dhe Senati i Shteteve të Bashkuara e mbështet partneritetin në rritje mes dy vendeve", - theksoi presidenti i Senatit Amerikan, Orrin Hatch. Kryetari i Kuvendit, Meta, gjatë takimit vuri në dukje se betimi i presidentit Trump është një ngjarje me rëndësi jo vetëm për SHBA- të, por edhe më gjerë. "Inaugurimi i presidentit Trump është me rëndësi jo vetëm për SHBA- të, por edhe në aspektin global. Besoj në një bashkëpunim në rritje për të ardhmen ndërmjet Shteteve të Bashkuara të Amerikës dhe Shqipërisë", - u shpreh Meta. Gjatë bashkëbisedimit, kreu i Kuvendit vlerësoi gjithashtu rëndësinë që kanë Shtetet e Bashkuara të Amerikës në rajonin e Ballkanit, duke theksuar se: "Angazhimi i SHBAve është shumë i rëndësishëm për paqen dhe sigurinë e rajonit". Më herët, kreu i Kuvendit të Shqipërisë u prit në një takim nga kryetari i Komisionit për Politikën e Jashtme në Kongresin Amerikan, Ed Royce. Meta në takim theksoi rëndësinë e një partneriteti ndërmjet Shqipërisë dhe Shteteve të Bashkuara të Amerikës, duke nënvizuar se: "Shqipëria është e vendosur për të forcuar edhe më tej partneritetin e saj me SHBA- të. Shqipëria është dhe do të jetë aleate e vendosur e Shteteve të Bashkuara të Amerikës. Mbështetja amerikane në Ballkan është jetike për stabilitet dhe siguri". Nga ana e tij, kryetari i Komisionit për Politikën e Jashtme në Kongresin Amerikan, z. Ed Royce ndau bindjen e përbashkët me z. Meta se aleanca solide SHBA- Shqipëri duhet forcuar më tej, në përballje të sfidave të përbashkëta globale e rajonale. Një ditë më parë, Meta pati takime edhe me kryetarin e Komisionit të Ligjeve dhe Procedurave në Kongresin Amerikan, Pete Sessions si dhe me ndihmës- sekretarin e Shtetit, ambasadorin William Brownfiled. Një grup i vogël qytetarësh festuan dje para Kryeministrisë në Tiranë ceremoninë e inaugurimit të presidentit të SHBA- ve, Donald Trump. Fotografi i agjencisë "EPA", Armando Babani ka fiksuar në fotografi festën e grupit të vetëquajtur "antisorosian", festë e cila ka përfunduar me hapjen e shampanjës në mënyrë ironike përballë Kryeministrisë dhe zyrës së Edi Ramës.