Alarmohet Greqia: Ushtarët shqiptarë, gjeste anti- greke
Shqiptarët me nënshtetësi greke bëjnë shqiponjën me duar në repart Hetohen për rreziqet e sigurisë kombëtare
Shtatë ushtarë shqiptarë rrezikojnë dënimin në Greqi. Djemtë janë pjesë e Ushtrisë Greke, por veprimi i tyre i fundit e ka irrituar jo pak opinionin publik në shtetin fqinj, përfshirë mediat dhe autoritetet. Ushtarët janë fotografuar teksa bënin shqiponjën me duar, një simbolikë që i referohet flamurit shqiptar dhe shqiponjës dykrenare të tij. Fotografia është publikuar në mediat greke, të cilat shkruajnë se djemtë do të duhet të përgjigjen përpara drejtësisë për këtë veprim. Ky simbol është identifikuar si shenjë nacionaliste dhe, sipas mediave greke, nëpërmjet saj "transmetohet ideja e Shqipërisë së madhe". Ndërkohë, në këto media thuhet se kanë filluar menjëherë kërkimet për të gjetur përgjegjësitë administrative. Në artikullin në fjalë shkruhet se shumë shqiptarë bëjnë shërbimin ushtarak në Greqi pasi janë pajisur me dokumente greke, por, pavarësisht kësaj, ata nuk janë fare mirënjohës për një vend që u dha aq shumë shanse në jetë. Ata raportojnë se ky nuk është rasti i parë. Ka shumë raste të tjera kur ushtarët shqiptarë që kryejnë shërbimin ushtarak të detyruar në Greqi, kanë bërë veprime të tilla. Ngjarja ka ndodhur në një repart elitar të këmbësorisë së ushtrisë greke në Mesologji të Greqisë, ku 7 ushtarët e ushtrisë greke, por me origjinë shqiptare, janë fotografuar mbrëmjen e së premtes së kaluar dhe në vazhdim kanë publikuar foton e bërë brenda ambienteve të repartit ushtarak, duke bërë me pëllëmbët e tyre simbolin e shqipes dykrenare. Ngjarja e pazakontë ka shqetësuar së tepërmi krerët e ushtrisë greke, të cilët kanë urdhëruar menjëherë hapjen e një hetimi, ndërsa komandanti i repartit dhe shefi i shtabit të forcave tokësore greke rrezikojnë postet e tyre. U deshën pak orë që autoritetet helene të kenë emrat e 7 shqiptarëve me shtetësi greke të përfshirë në këtë incident. Ata u ndaluan dhe u morën në pyetje prej autoriteteve ushtarake
greke. Janë kontrolluar edhe telefonat e tyre celularë, nëse janë fotografuar ambiente të repartit ose armatime të gjendura në të, si dhe telefonatat e tyre, nëse kanë komunikuar me persona të cilësuar si të rrezikshëm për sigurinë kombëtare greke. Sipas një njoftimi të Shtabit të Përgjithshëm të Ushtrisë, hetimet janë hapur për mënyrën e futjes së telefonit brenda ambienteve të repartit, si dhe për shkallën e përfshirjes së 7 kadetëve në propagandë anti- greke. Mësohet se 7 kadetët do të bënin betimin e tyre në datën 2 shkurt dhe do të shërbenin në ushtrinë greke për 9 muajt
e ardhshëm. Me interes pritet edhe kthimi nga SHBA- ja, ku ndodhej për ceremoninë e inaugurimit të presidentit të ri amerikan, i ministrit grek të mbrojtjes, Panos Kammenos. Ky i fundit njihet si përkrahës i linjës patriotike, shpeshherë e konsideruar si ekstremiste, për mbrojtjen e identitetit helen në ushtri, ndaj dhe pritet që dënimet ndaj 7 kadetëve do të jenë shumë të ashpra. Personave që ndodhen në foto u rrezikohet nënshtetësia greke, që tashmë e kanë marrë, ndërsa, sa i takon dënimit, do të merret parasysh edhe ndarja e specialiteteve të tyre në ushtri.