Terrorizmi, arrestohet një tjetër shqiptar në Gjermani
Do të sulmonte ushtrinë gjermane
Një
21- vjeçar shqiptar është arrestuar nga policia gjer mane ditën e diel, me akuzën se po planifikonte një krim serioz me objektiv policinë dhe ushtrinë gjermane. "DW" citon autoritetet gjermane, të cilat thonë se i dyshuari kishte lidhje me adoleshentin austriak me origjinë shqiptare, i cili u arrestua të premten në Vjenë. Edhe shqiptari në Vjenë akuzohet se planifikonte sulme terroriste dhe se kishte lidhje me grupe radikale islamike. "I riu shqiptar i arrestuar në Austri kishte qëndruar në shtëpinë e 21- vjeçarit në Neuss të Gjermanisë dhe kishte diskutuar sulmet kundër forcave gjermane të sigurisë", tha një zëdhënës i prokurorit në Dusseldorf. Ndërsa një zëdhënës i Ministrisë së Brendshme të Austrisë tha se lidhja e çështjes së të riut të arrestuar në Vjenë me Gjermaninë ishte e qartë. Dy ditë më parë, ministria austriake tha se arrestimi në Vjenë i shqiptarit kishte penguar një sulm të pashmangshëm, me gjasa ndaj sistemit të metrove në kryeqytet. "Kishte indikacione se një sulm i tillë ishte planifikuar dhe do të ndodhte shumë shpejt", - tha Konrad Kogler, Drejtori i Përgjithshëm i Sigurisë Publike, për radion "ORF" të Austrisë. Revista gjermane "Focus" tha se operacioni për arrestimin e të riut në Neuss të Gjermanisë ishte rezultat i bashkëpunimit të mirë të agjencive europiane të inteligjencës. Policia konfiskoi kompjutera dhe celularë në shtëpinë e shqiptarit dhe arrestoi përkohësisht bashkëshorten e të dyshuarit. Gjermania është në alarm që pas sulmit terrorist me kamion në Tregun e Krishtlindjes në Berlin, ku mbetën të vrarë 12 persona. Ky sulm është marrë përsipër nga ISIS- i.