Drejtësia, Meta: Zbatojmë ligjin, nuk interpretojmë
Kuvendi, ngrihet Këshilli i Emërimeve në Drejtësi, shorti zgjedh 9 anëtarë Hysi: Disa gjyqtarëve u është mohuar e drejta e garës
Reforma më e debatuar, ajo në drejtësi nisi dje zba timin me ngritjen e Këshillit të Emërimeve në Drejtësi. Ky është një institucion i ri kushtetues me 9 anëtarë nga trupa gjyqësore dhe e prokurorisë, që sipas rregullave të reja, përzgjidhen me short. Në ambientet e Kryesisë së Kuvendit u zhvillua dje hedhja e shortit për përzgjedhjen e anëtarëve të Këshillit të Emërimeve në Drejtësi. Por, përpara hedhjes së shortit, Partia Socialiste akuzoi Këshillin e Lartë të Drejtësisë për mungesë transparence në hartimin e listave, duke vlerësuar kriteret në mënyrë preferenciale. “Në dijeninë tonë, të paktën nga Këshilli i Lartë i Drejtësisë janë parashtruar pesë magjistratë”, tha deputetja Vasilika Hysi. Megjithatë, ky moment u kalua pasi asnjë nga institucionet që hartojnë listat nuk i dha të drejtë Partisë Socialiste, përfshirë këtu edhe Kuvendin. Ndërsa kryetari i Kuvendit, Ilir Meta, nënvizoi se mesa ai është në dijeni, vetëm një gjyqtar ka shfaqur pretendime dhe pasi është njohur me kriteret është shprehur se i tërheq pretendimet, pasi nuk i përmbush kriteret. “Jam plotësisht dakord që procesi të jetë transparent, jo vetëm formalisht dhe vizualisht, por edhe në përmbajtje. Kjo është arsyeja që personalisht i kam kërkuar sekretares së përgjithshme që nga momenti i shpalljes së këtij shorti zyrtarisht nga ana e Kuvendit të lihej disa ditë kohë, me qëllim njohjen e të gjithë opinionit publik, por edhe njohjen të gjithë të interesuarve, të cilëve mund t’u ishte mohuar për arsyeje të një interpretimi të ndryseshim apo jo të drejtë të institucioneve të caktuara e drejta për të qenë kandidat. Ne jemi këtu për të zbatuar ligjin në mënyrën më transparente. As unë dhe as ne të gjithë këtu së bashku nuk jemi një gjykatë që interpreton ligjin. Prandaj dhe gjithë drejtimin e procedurave unë ia kam dhënë sekretaren e përgjithshme, si drejtuesja kryesore e shërbimeve të Kuvendit edhe për të dhënë përgjigje më konkrete”, - deklaroi z. Meta. Kryetari i Kuvendit përmendi se miratimi me konsensus i 7 ligjeve prioritare të reformës në sistemin e drejtësisë ishte një nga arritjet më të rëndësishme të sesionit të kaluar parlamentar. “Miratimi me konsensus i 7 ligjeve prioritare të reformës në sistemin e drejtësisë, duke i hapur rrugë zbatimit të plotë të dispozitave të reja të Kushtetutës, miratuar me konsen- sus dhe në bashkëpunim me partnerët tanë të BE- së dhe SHBA- ve ishte një nga arritjet më të rëndësishme të sesionit të kaluar parlamentar. Një nga risitë e ndryshimeve kushtetuese të 22 korrikut 2016 ishte edhe krijimi i një organi të ri, Këshillit të Emërimeve në Drejtësi, i cili është një organ i pavarur, përgjegjës për të verifikuar përmbushjen e kushteve ligjore dhe të kritereve profesio- nale e morale të kandidatëve për inspektorë të Lartë të Drejtësisë si dhe të kandidatëve për anëtarë të Gjykatës Kushtetuese”, - u shpreh z. Meta. Por sipas deputetes së PS- së, Vasilika Hysi kriteret janë zbatuar në mënyra të ndryshme. “Janë mbajtur standarde të ndryshme. Kandidatët nuk kanë ditur se cila është lista e personave që janë kaluar dhe janë përjashtuar. Janë venë para fak- tit të kryer pa u dhënë mundësi për ankimim”, u shpreh Hysi. Nisur nga ky pretendim i PS- së, sekretarja e Përgjithshme e Kuvendit, Albana Shtylla vuri në dukje se janë ndjekur të gjitha praktikat ligjore lidhur me këtë proces. Hedhja e shortit, që u ndoq edhe nga përfaqësuesit e misioneve OPDAT dhe EURALIUS zgjati pak minuta. Shorti u hodh vetëm për përfaqësuesit e gjyqësorit, sepse organi i akuzës kishte sjellë vetëm 3 kandidatë, aq sa vende duhet të merrte Prokuroria e Përgjithshme dhe ajo e Apelit. Anëtarët e KED janë: nga Gjykata Kushtetuese: Besnik Imeraj dhe Vladimir Kristo ( Altina Xhoxhaj, anëtar zëvendësues). Anëtarët nga Gjykata e Lartë: Mirela Fana ( Artan Zeneli, anëtar zëvendësues). Anëtar nga Prokuroria e Përgjithshme: Rovena Gashi. Anëtarët nga prokuroritë e Apelit: Gentian Trenova dhe Fatjona Memçaj. Anëtarët e KLD- së nga Gjykatat e Apelit: Brikena Ukperaj Lubonja, Ervin Metalla. Anëtar nga gjykatat administrative: Kastriot Selita ( Gentian Medja, anëtar zëvendësues).