Lejet e ndërtimit, gjoba 100 mijë - 1.5 mln lekë për shkelje afatesh
Kërkesa për shtyrje afati, deri në tri herë dhe 45 ditë para përfundimit të afatit Drafti i qeverisë i jep kohë ndërtuesit, por rrit gjobat
Ndërtuesit që nuk ar rijnë në zbatojnë afatet kohore të lejes së ndërtimit mund ta shtyjnë vlefshmërinë e saj në afat, por kundrejt penaliteteve financiare. Ndërtuesi ka të drejtë të kërkojë deri në tri herë shtyrje të aftit të vlefshmërisë së lejes së ndërtimit, por penalitetet për zgjatjen e kohës nisin nga 100 mijë lekë deri në 1.5 milionë lekë. Ndryshimet janë pjesë e drafti që po përgatit qeveria për t’u ardhur në ndihmë ndërtuesve që nuk mund ta përfundojnë projektin brenda afateve kohore të përcaktuara në leje.
DRAFTI
Personat që kanë marrë një lejë ndërtimi, por nuk kanë përfunduar brenda afatit punimet mund të kërkojnë shtyrje të saj pranë institucionit që e ka lëshuar. Me ligjin aktual, kjo procedurë mund të kryhet vetëm një herë, por subjekti duhet të paguajë edhe gjobën. Qeveria duket se po mendon që të krijojë hapësira të tjera për sektorin e ndërtimit, duke mundësuar që në rastet e mospërfundimit në kohë të ndërtimit, leja mund të shtyhet deri në tri herë. “Shtyrja e afatit të përfundimit të punimeve mund të bëhet deri në tri herë, për një periudhë jo më të gjatë se afati fillestar i përcaktuar në lejen e ndërtimit, mbi bazën e një kërkese të dorëzuar brenda afatit të vlefshmërisë së lejes dhe në çdo rast, jo më vonë se 45 ditë përpara përfundimit të afatit të lejes”, thuhet në draft. Ndërkohë, me marrjen e miratimit për shtyrje të lejes duket se do të kemi edhe rritje të gjobave në mënyrë progresive. “Shkelja e afatit të fillimit apo përfundimit të punimeve dënohet me gjobë nga 100 mijë lekë deri në 500 mijë lekë”, thuhet në ligj. Sipas ndryshimeve, rritja progresive e gjobave në bazë të shtyrjes do të thotë që në herën e dytë të shtyrjes subjekti do të paguajë nga 200 mijë deri 1 milion lekë dhe së treti nga 300 mijë deri në 1.5 milionë lekë.
LEJET
Sistemi elektronik i lejeve do të bëjë të mundur realizimin e shërbimit me një ndalesë për lejet e ndërtimit ( One Stop Shop). Aplikimi do t’i dërgohet bashkisë dhe bashkia do të kryejë vetë, ( përmes sistemit) të gjithë bashkërendimin me institucionet e tjera publike, me afate të qarta dhe pa vonesa. Nëse institucionet nuk përgjigjen brenda 10 ditësh, kërkesa konsiderohet e miratuar në heshtje. Afati i shqyrtimit të lejes së ndërtimit nga bashkia është 15 ditë, ndërsa institucionet e tjera që duhet të japin mendimin e tyre në lidhje me lejen duhet të përgjigjen brenda 10 ditëve pune. Në rast se institucionet publike nuk i japin përgjigje bashkisë brenda 10 ditëve pune, miratimi/ pëlqimi i tyre konsiderohet i dhënë në heshtje dhe bashkia mund të vijojë më tej me shqyrtimin e aplikimit. Në çdo rast të mungesës së përgjigjes nga bashkia, brenda 60 ditësh nga dorëzimi i kërkesës së aplikuesit, sistemi gjeneron vendim për miratimin në heshtje. Bashkërendimi me të gjitha institucionet që duhet të japin mendimin e tyre mbi lejen e ndërtimit ( p. sh. IMK, ZRPP, Shërbimi Arkeologjik, etj.) do të kryhet përmes sistemit elektronik të lejeve nga bashkia përgjegjëse. Mbledhja e tarifave të shërbimit për të gjitha institucionet do të kryhet nga bashkia, si zyrë e shërbimit me një ndalesë, përmes sistemit. Gjithashtu, nëpërmjet sistemit do të sigurohet njoftimi i vazhdueshëm i aplikuesve lidhur me statusin e kërkesës së tyre. Ky sistem do të sigurojë unifikimin e procedurave dhe standardizimin e formateve për të gjitha bashkitë në sistem. Sistemi do të kryejë përllogaritjen automatike të afateve të shqyrtimit të kërkesës dhe do të evidentojë dhe informojë nëpunësit për vonesat e mundshme.