"Kafazi i hekurt", dështon përballja e Shullazit me Beqjan
Policia, gjykatës: Nuk marrim përsipër sigurinë e dëshmitarit në sallë Avokatët dhe të pandehurit ikin nga salla e gjyqit
Dështoi dje seanca e parë gjyqësore, ku ishte parashikuar ballafaqimi i Emiljano Shullazit dhe i 4 të pandehurve të tjerë me dëshmitarin e mbrojtur të drejtësisë, Ylvi Beqja. Seanca dështoi për faktin se pas 3 orësh nga nisja e seancës, të pandehurit dhe avokatët e tyre mbrojtës braktisën sallën e gjyqit, pasi Gjykata e Krimeve të Rënda nuk ia doli mbanë të gjente një sallë të përshtatshme që Beqja të ballafaqohej me ata, të cilët i ka akuzuar për kërcënim dhe gjobëvënie. Mësohet se ne çelje të seancës me dyer të mbyllura, avokatët e të pandehurve bënë një kërkesë paraprake që kjo seancë të zhvillohej në një sallë me kafaz hekuri dhe jo me xham, në mënyrë që ata të komunikonin lirisht dhe në mënyrë konfidenciale me të mbrojturit prej tyre. Po ashtu, edhe të pandehurit Emiljano Shullazi, Gilmando Dani, Blerim Shullazi, Endrit Qyqa dhe Endrit Zela bënë kërkesë që të ballafaqoheshin me biznesmenin Ylvi Beqja. Ndërkohë, marrjen e dëshmisë së biznesmenit të mbrojtur në kushte normale, në kafaz të hekurt apo në atë me xham, organi i akuzës ia la në "dorë" gjykatës. Pikërisht në këtë moment, mësohet se gjykata u tërhoq për vendimin dhe pas një ore vendosi që seanca të zhvillohej në kaf- az me hekura dhe pyetja e dëshmitarit të bëhej në kushte normale, duke mos e mbajtur të fshehur nga të pandehurit dhe avokatët e tyre. Pas këtij vendimi, u ndërrua salla, duke shkuar në atë me kafaz të hekurt. Ndërkaq, burime të sigurta të "Gazeta Shqiptare" bënë me dije se, pasi kaluan rreth 60 minuta, trupa gjyqësore u fut në sallë dhe deklaroi se duke u mbështetur në një letër të Policisë së Shtetit, seanca nuk mund të bëhej në sallën me kafaz hekuri ( me numër 3), pasi Zyra për Mbrojtjen e Dëshmitarëve të Policisë së Shtetit nuk merrte përsipër sigurinë e dëshmitarit në atë sallë. Pas këtij vendimi, avokatët dhe të pandehurit u kthyen sërish në sallën numër 1 me kafaz me xham dhe ku biznesmeni Ylvi Beqja duhej të qëndronte i fshehur pas policisë dhe pa shikueshmërinë e askujt. Por avokatët dhe të pandehurit kundërshtuan këtë vendim të ndërmjetëm të gjykatës, duke u larguar nga salla e gjyqit. Ndërkaq, në një prononcim për "GSH", avokati i të pandehurit Gilmando Danit, Alban Qafa tha se kishin kërkuar përjashtimin e trupës gjykuese për njëanshmëri.
AVOKATI
"Ne si avokatë, por edhe klientët tanë kërkuam përjashtimin e trupit gjykues. Trupa gjyqësore, pasi u këshillua për 30 minuta, vendosi të vazhdojë me sigurimin e provës, edhe pse ajo ishte jashtë afateve procedurale, edhe pse kështu kishte vendosur gjyqtari i vetëm i hetimeve paraprake. Ne si avokatë i bëmë me dije gjykatës se vendimin e gjyqtarit të vetëm e kishin apeluar brenda 5 ditëve konform ligjit dhe derisa Gjykata e Apelit ta gjykonte atë brenda 10 ditëve, ata nuk mund ta bënin sigurimin e provës", tha avokati Qafa. Gjithashtu, ai theksoi se, "është absurde që një shkresë e policisë del mbi vendimin e ndërmjetëm të gjykatës dhe është një pretendim absurd që policia nuk garanton dot sigurinë brenda në Gjykatën e Krimeve të Rënda".