Sheshi "Skënderbej", Veliaj: Do vishet me gurë nga e gjithë Shqipëria
Rama: Ky shesh, xhevahiri më i shkëlqyeshëm i programit tonë të rilindjes urbane "Në çdo pllakë do gdhendet emri se nga vinë"
Në sheshin "Skënder bej" ditën e djeshme janë vendosur dy pllakat e para, të cilat përbëheshin nga materiale të përpunuara nga Tropoja dhe Vlora. Këto pllaka, të cilat dëshmojnë se projekti po vjen drejt fundit, janë vendosur nga kryeministri Edi Rama dhe kryebashkiaku Erion Veliaj. Kreu i bashkisë, Veliaj deklaroi se inaugurimi i punimeve do të bëhet pas 4 muajsh, në prag të zgjedhjeve të qershorit, ndër të tjera ai foli edhe një lidhje mes pushtetit qendror dhe atij vendor, pa të cilën punët në qytetin e Tiranës janë të pamundura. Risi e këtij projekti veç gjelbërimit është edhe parkingu nëntokësor, i cili e ka hyrje/ daljen në Rrugën e Durrësit dhe ka rreth 300 vende parkimi. Sa u përket pllakave, të cilat do të ' veshin' sheshin "Skënderbej", ato do merren nga të gjitha qytetet dhe trevat shqiptare, si dhe do u gdhenden sipër emrat e tyre.
PROJEKTI
Pas 9 vitesh nga prezantimi i projektit belg për transformimin e sheshit "Skënderbej" të premten, në mënyrë simbolike u vendosën gurët e parë, duke shënuar nisjen e fazës finale për ndërtimin e sheshit "Skënderbej" dhe kthimin e tij në që shesh pedonal. Kryeministri Rama nënvizoi se projekti për sheshin ka përfituar përmirësime shumë të vlefshme si në aspektin e larmishmërisë së gurëve, të cilët vijnë nga të gjitha trojet shqiptare, ashtu edhe të funksionalitetit. Kreu i qeverisë tha se për fatin më të mirë të kryeqytetit, sot përputhet qeveria në sinergji me Bashkinë e Tiranës. "Ky shesh është xhevahiri më i shkëlqyeshëm i kurorës së programit tonë të rilindjes urbane", tha Rama. Kryetari i Bashkisë së Tiranës, Erion Veliaj, deklaroi se projekti që po realizohet është bazuar në projektin e 2008- ës të ideuar nga Edi Rama, ndërsa u është nënshtruar edhe dëgjesave me qytetarët, duke reflektuar ndryshimet e nevojshme për shkak të kohës që ka kaluar. "Sot sheshi do të ketë 50% pllakë. Madhësia e tij në total është 28 mijë metra katrorë, që do të thotë që barazimi i pjesës së ngurtë me pjesën e gjelbërimit krijon një ekosistem, që është më i pranueshëm për dimrin e ftohtë dhe më i pranueshëm për verën që po bëhet gjithnjë e më e nxehtë", tha Veliaj. Kryebashkiaku tha se një ndër simbolikat më të forta të sheshit do të jetë vendosja e gurëve nga e gjithë Shqipëria. "Dy gurët e parë që do të vendosim sot me kryeministrin, njëri është nga Tropoja, tjetri nga Vlora, por do të kemi nga të gjithë trevat, përfshirë Çamërinë, Kosovën, Manastirin dhe gjithë zonat dhe krahinat e Shqipërisë, për t'u siguruar që kjo jo vetëm është një metaforë dhe një simbolikë e bashkimit kombëtar, por edhe e faktit që Tirana është një shtëpi e hapur e të gjithëve", tha Veliaj. Veç gurëve natyralë nga i gjithë vendi, në këtë shesh qendror do të përdoret edhe bimësi nga të gjitha trevat shqiptare për të treguar unitetin kombëtar. Projekti parashikon krijimin e një hapësire të gjelbër në 50% të sipërfaqes së sheshit, duke hijëzuar të gjitha akset kryesore të lëvizjes pedonale. Në këtë shesh do të ketë shumëllojshmëri mjedisesh dhe hapësirash, pasi do ketë rreth 11 lulishtesh të ndryshme. Ujitja dhe shatërvanët që do vendoset në shesh do të funksionojnë me sistem impianti ekologjik, duke filtruar dhe përdorur ujin e reshjeve, pasi sheshi do të ketë një pjerrësi në qendër të tij, duke krijuar një piramidë, e cila do të krijojë mundësinë e kullimit të ujit. Fituese e konkursit të sheshit "Skënderbej" më 11 prill 2008 u zgjodh studioja belge "51N4E". Me këtë projekt sheshi qendror prej 28 mijë m2 ngjitet butësisht në qendër, duke krijuar një piramidë me pjerrësi 3%, duke arritur në lartësinë 2.3 m mbi lartësinë e skajeve. Por, në atë kohë ekspertët kërkuan që pjerrësia të ulej në 1- 2% që të mos ndërpritej vizualiteti me pjesën tjetër të bulevardit. Administrata aktuale e bashkisë nuk ka dhënë detaje se sa do jetë pjerrësia.