Ish- reparti ushtarak i Rrencit, qendër multifunksionale për emergjencat civile në Ballkan
Shemsi Prençi: Projekti kap vlerën 50 milionë euro
SHKODËR - Ish- reparti ushtarak në Rrenc të njësisë Guri i Zi në Shkodër do të kthehet në një qendër multifunksionale për emergjencat civile për gjithë Ballkanin. Hapësira prej 37 mijë metrash katrorë është parë nga afër nga drejtuesit e Emergjencave të Shqipërisë, Kosovës dhe Maqedonisë, shtete këto që kanë një marrëveshje të përbashkët në rastet e katastrofave apo emergjencave të ndryshme. Ky projekt do të zgjasë 5 vite, ndërsa pritet të nisë këtë vit. Vlera e investimit prej 50 milionë eurosh do të financohet nga të gjitha shtetet, mbështetur edhe nga SHBA- të. Kreu i Emergjencave Civile të Shqipërisë, Shemsi Prençi foli dje për rëndësinë e këtij projekti. "Natyrisht që është një projekt shumë i rëndësishëm për Shqipërinë, Kosovën dhe Maqedoninë. Jemi në bisedime edhe me Malin e Zi, ndërsa po i bëjmë ftesë edhe Bosnjë dhe Hercegovinës që të na bashkohet në këtë projekt madhor. Do jetë një qendër multifunk- sionale për emergjencat civile për të gjitha këto shtete. Do të ketë një vend për uljen e helikopterëve, do të shërbejë për shuarjen e zjarreve, por edhe evakuimin e të përmbyturve në raste emergjencash, apo edhe për trajnime të ndryshme që mund të na shërbejnë. Kemi mbështetjen e amerikanëve dhe sot ( dje) jemi me përfaqësues të ambasadës amerikane dhe drejtues të krizave të Kosovës dhe Maqedonisë. Është zgjedhur Shkodra, sepse është një qytet strategjik dhe ndodhet mes këtyre shteteve. Shkodra ka gjithnjë risk për përmbytje, ndaj do jetë një ndihmë e madhe kjo qendër që do të ngrihet. Falënderojmë partnerët tanë për mbështetjen", - tha Prençi. I pyetur nëse ka probleme pronësie duke qenë se në ish- repartin ushtarak të Rrencit ka mbishkrime "pronë private", kreu i Emergjencave Prençi, u shpreh se nuk ka asnjë problem të tillë dhe se i gjithë reparti është pronë e Ministrisë së Brendshme. se. ni.