Komisioni i Ekonomisë, konsensus për statusin e naftëtarit, ja përfitimet
Projektligji, punëdhënësi të paguajë një kontribut shtesë në masën 3% përveç kontributit të detyrueshëm Ministri Klosi: Përfitojnë mbi 5 mijë persona
Projektligji për statusin e punonjësve në in dustrinë e naftës dhe të gazit, u miratua me konsensus mes mazhorancës dhe opozitës në Komisionin parlamentar të Ekonomisë. Ministri i Mirëqenies Sociale dhe Rinisë, Blendi Klosi, në prezantim të projektligjit, kërkoi mbështetjen e projektligjit nga të gjitha palët, pasi ai rregullon një padrejtësi të bërë në vite punonjësve të këtij profesioni të vështirë. Projektligji parashikon të drejtat e punonjësve të industrisë së naftës dhe gazit, në marrëdhënien e tyre të punës, pagës, mbrojtjes dhe sigurisë në punë, shëndetit, pensionit etj. Në total sipas ministrit Klosi pritet të përfitojnë vitin e parë të implementimit të ligjit rreth 5 mijë persona. "Vendimi për të miratuar ' Statusin e punonjësve të industrisë së naftës dhe gazit' do të thotë trajtim i rritur financiar dhe bashkë me të, edhe një sërë trajtimesh të tjera që iu ofrojnë lehtësira rreth 5 mijë qytetarëve që kanë punuar në këtë profesion jo të lehtë", - deklaroi ministri Klosi.
PROJEKTLIGJI
Ditën e djeshme, projektligji "Për statusin e punonjësve të industrisë së naftës dhe gazit" u miratua në Komisionin e Ekonomisë me votat e mazhorancës dhe opozitës. Sipas kreut të MMSR- së, Blendi Klosi, statusin e përfitojnë ata që kanë punuar apo vijojnë të punojnë në puset e naftës. Është parashikuar që mosha e daljes në pension dhe vjetërsia e nevojshme për të përfituar këtë pension për meshkujt është 60 vjeç, me një vjetërsi pune prej 30 vjetësh, nga të cilat 20 vjet në profesionin si naftëtar. Ndërsa për gratë është parashikuar 55 vjeç, periudha e punës në këto profesione është 15 vjet dhe vjetërsia totale 30 vjet. Sipas projektligjit të ri, përfituesit e statusit të naftëtarit dy herë në vit duhet të bëjnë kontrolle mjekësore falas në institucionet shtetërore apo private në vend. Shteti detyron kompanitë që operojnë në industrinë e naftës dhe gazit për kurimin falas të sëmundjeve profesionale të shkaktuara. të ulët se 33 mijë lekë. Një element i rëndësishëm i këtij statusi është edhe trajtimi me pagesë në rast ndërprerjeje të punës në këtë sektor me qëllim garantimin e një minimumi jetese dhe mosbraktisjen e tyre, e cila nuk do të jetë më pak se 80% e pagës minimale në shkallë vendi. Nëpërmjet statusit, naftëtarëve u lind e drejta që dy herë në vit të bëjnë kontroll mjekësor falas në institucionet shëndetësore publike dhe private. Gjithashtu, parashikohet të jepet shtesë pensioni 1% për çdo vit pune në industrinë e naftës dhe gazit, por kjo shtesë nuk mund të jetë më shumë se 40% e pensionit të pleqërisë. Për naftëtarët që janë aktualisht në punë është parashikuar që punëdhënësi të paguajë një kontribut shtesë në masën 3% përveç kontributit të detyrueshëm, me qëllim financimin e pensionit si rezultat i uljes së moshës së daljes në pension. Ky projektligj ka një faturë financiare që llogaritet rreth 400 milionë lekë në vit, faturë të cilën qeveria shqiptare merr përsipër ta sigurojë edhe nga vetë skema e sigurimeve shoqërore.