Gjoka: Tirana mbetet Tiranë, nuk i besoj krizës bardheblu

Kukësi udhëton në "Selman Stërmasi", aty ku bardheblutë luajnë fatet e sezonit në këtë veprimtari Trajneri i verilindorëve kërkon rezultat pozitiv

Trajneri i Kukësit, Ernest Gjoka, ka folur për ndeshjen me Tiranën në Kupë, lëvizjet në formacion dhe kampionatin. Timonieri verilindorëve nuk e nënvlerëson aspak kundërshtarin, ndonëse bardheblutë kanë pasur probleme të shumta në këtë sezon dhe në merkaton e janarit nuk mundën të përforcohen me asnjë lojtar pas bllokimit që iu bë nga ana e FIFA- s. E sikur të mos mjaftonte kjo, u larguan nga ekipi edhe Muzaka e Vucaj, për të mos llogaritur dëmtimin e Karabecit, që e vendosin Josën në vështirësi të mëdha. Gjithsesi, Gjoka deklaron se nuk i beson krizës së 24 herë kampionëve, pasi, siç e thotë ai vetë, ekipet nxjerrin gjithmonë më të mirën e tyre kur janë në krizë.

TIRANA

"Mendoj që Tirana mbetet gjithmonë Tiranë. Kjo do të thotë që duhet të jemi shumë vigjilentë dhe seri- ozë në këtë ndeshje, pavarësisht problematikave që ka pasur kundërshtari ynë. Unë nuk kam besë, sepse gjithmonë ekipet e mira atëherë kur mendon se janë në krizë, nxjerrin më të mirën e tyre", u shpreh Ernest Gjoka.

KËRKESA

"Prapë unë këmbëngul se duhet të jemi seriozë dhe duhet të japim gjithçka. Tashmë kemi hyrë në një garë jo vetëm sportive, por edhe psikologjike. Duhet të jemi të vëmendshëm dhe të përgjegjshëm për atë që po bëjmë. Nëse mendojmë se jemi ne më të mirët, atëherë do të rrezikojmë gjithçka", thotë trajneri i kryesuesve të kampionatit.

NDRYSHIMET

"Do të jenë dy rotacione, për të marrë orët e punës dhe për t'i futur edhe këta lojtarë në gjendjen e grupit duke menduar edhe për ndeshjen e radhës në kampionat. Kështu që do të ketë një mini- rotacion. Unë kam besim tek i gjithë grupi, prandaj edhe ndërhyrjet në merkato kanë qenë të pakta", thotë trajneri sa u takon ndryshimeve në formacion.

E PARA

"Shpresoj të japim maksimumin që ta bëjmë më të lehtë ndeshjen e dytë. Fusha do ta tregojë se do të jemi ne, ata që do të kalojnë në fazën tjetër", deklaron ai pasi e di mirë që një pjesë e madhe e kualifikimit vendoset që në këtë 90- minutësh.

KAMPIONATI

"Në kampionat gjithçka është e hapur. Të mos harrojmë që Skënderbeu ka qenë tetë pikë para dhe është tetë pikë pas nesh. Në asnjë moment nuk duhet të jemi të relaksuar dhe me mendjen se gjithçka është mbyllur në favorin tonë. Më e vështira tani fillon", e mbyll trajneri i verilindorëve në lidhje me objektivin më të madh që kanë kuksianët.