Drejtësia, 100 kandidatë. Vlahutin: Nisi hapi i parë
Aplikimet tek Avokati i Popullit, juristët që iu përgjigjën thirrjes së SHBA e BE "Ata që kanë interesa personale janë kundër reformës"
Me mbylljen e afatit të aplikimit janë më shumë se 100 kandidatë që synojnë pozicionet e anëtarëve të institucioneve të rivlerësimit kalimtar të gjyqtarëve dhe prokurorëve. Në faqen e Avokatit të Popullit u publikuan dje emrat që kanë bërë aplikimet pranë zyrës së protokollit të institucionit të Avokatit të Popullit. Ambasadorja e BE në Tiranë, Romana Vlahutin tha se vetëm ata që kanë interesa personale e kundërshtojnë reformën në drejtësi. "2 vite më parë kishte shumë pak besim tek gjyqësori - u shpreh zonja Vlahutin në publikimin e gjetjeve të raportit mbi besimin e qeverisjes në 2016. - Kemi 2 vite që luftojmë për të arritur besimin e qytetarëve tek drejtësia". Sipas saj, hapi i parë i reformës në drejtësi nisi dy ditë më parë me Operacionin Ndërkombëtar të Monitorimit. Nga e premtja, institucioni i Avokatit të Popullit do të vijojë me verifikimin e dokumentacioneve të dorëzuara për t'ia dërguar më pas Operacionit Ndërkombëtar të Monitorimit. "Kemi një javë kohë në dispozicion, siç parashikon ligji, për të bërë verifikimin e dokumentacionit për secilin që ka shprehur interes dhe do ndërtojmë 2 lista, me ata që i plotësojnë kriteret dhe ata që nuk i plotësojnë. Kjo është pjesa jonë. Më pas këto lista dhe dokumentacioni i dërgohet ONM- së, që ka 14 ditë kohë për të bërë verifikimet e duhura dhe më pas na i rikthen sërish ne me rekomandimet përkatëse që do të përgatisë dhe ne pastaj ia dërgojmë parlamentit", tha z. Totozani. Por, sërish puna nuk përfundon këtu. "Janë paralelisht disa procese që po ndjek institucioni i Avokatit të Popullit. Është procesi i vetingut, pra 7- ditëshi ynë, paralelisht sot mund të bëhet publike lista e shoqatave që do marrin pjesë në komisionin e verifikimit të shoqërisë civile për anëtarë të KLGJ dhe KLP, anëtarët që do përzgjidhen nga shoqëria civile. Më pas Avokati i Popullit duhet të ngrejë 2 komisione AD HOC. Edhe në këtë drejtim jemi në hapat e fundit për zgjedhjen e kandidaturave që vijnë nga radhët e avokatëve, qoftë në KLGJ, qoftë në KLP. Këto dy komisione do shqyrtojnë kandidaturat edhe nga radhët e avokatisë. Pastaj ka edhe detyra të tjera në reformën në drejtësi, monitorime, rol vëzhguesi, puna administrative vazhdon ende në disa plane", shprehet Avokati i Popullit. Nga mbi 100 aplikantë, vetëm 27 do të përzgjidhen, nga të cilët 4 për komisionerë publikë, 14 për komisionin e verifikimit dhe një trupë gjykuese prej 7 vetash në Kolegjin e Apelimit.