Kërcënoi me jetë prokurorin, arrestohet
Përfaqësuesi i akuzës kërkoi 8 vite burg për djalin. Prokuroria: Janë shtuar sulmet ndaj prokurorëve Dyshimi, 56- vjeçari Nazmi Çangu kanosi zyrtarin "do të të vras"
Një 56- vjeçar nga Kru ja është arrestuar dy ditë më parë, pasi ka kërcënuar në sallën e gjyqit prokurorin Bujar Memia. Bëhet fjalë për Nazmi Çangun, i cili akuzohet për veprat penale: "Kanosje" dhe "Prodhim e shitje e lëndëve narkotike. Mësohet se 56- vjeçari e ka kërcënuar prokurorin, pasi ky i fundit kishte kërkuar dënimin e djalit të Çangut me 8 vite burg për prodhim dhe shitje të lëndëve narkotike. "Do të të vras", i tha Nazmi Çangu përfaqësuesit të akuzës. Menjëherë policia ka bërë arrestimin e tij, ndërsa më pas i është bërë një kontroll edhe në banesë. Nga kontrolli në shtëpi, atij iu gjetën dhe iu sekuestruan në cilësinë e provës materiale 76 kg kanabis sativa. Pas vënies në pranga të Nazmi Çangut, ka reaguar edhe Prokuroria e Përgjithshme, e cila deklaroi se nuk është rasti i parë që një prokuror kërcënohet për shkak të detyrës. "Pavarësisht se nuk është rasti i parë që një prokuror kërcënohet për shkak të detyrës, Prokuroria e Përgjithshme është vënë në dijeni se sjelljet intimiduese kundër prokurorëve, si zyrtarë të rëndësishëm të shtetit janë shtuar ndjeshëm. Për shkak të sulmeve publike, prokurorët tashmë janë kthyer në subjekte të shantazhit dhe kërcënimit nga persona që përballen me ligjin për veprat penale që kanë kryer. Prokuroria e Përgjithshme, duke ritheksuar mbështetjen e saj për reformën në drejtësi, vlerëson se fjalori kundër prokurorëve, i përdorur për të justifikuar ndryshimet ligjore ka demotivuar këta të fundit, të cilët gjithsesi po vijojnë të përfaqësojnë denjësisht shtetin në proceset penale për persona të përfshirë në vepra penale", thuhet në deklaratën për shtyp të këtij institucioni.
REAGIMI I PROKURORISE
Prokuroria e Përgjithshme vlerëson reagimin e shpejtë të Policisë së Shtetit për arrestimin e shtetasit N. Ç., i cili ka kërcënuar në sallën e gjyqit, gjatë ushtrimit të detyrës së tij, prokurorin e Prokurorisë Krujë, Bujar Memia.
Në seancën e zhvilluar ditën e pardjeshme në Gjykatën e Rrethit Gjyqësor Krujë, prokurori ka paraqitur konkluzionet për djalin e shtetasit N. Ç, i akuzuar për veprën penale të "Prodhimit dhe shitje të lëndëve narkotike", në bashkëpunim, dhe u kërkua dënimi me 8 vjet burgim. Në përfundim të seancës gjyqësore, shtetasi N. Ç. ka kërcënuar me jetë prokurorin, per shkak se ky i fundit kërkoi dënimin e të birit në bazë të provave.
Pavarësisht se nuk është rasti i parë që një prokuror kërcënohet për shkak të detyrës, Prokuroria e Përgjithshme është vënë në dijeni se sjelljet intimiduese kundër prokurorëve, si zyrtarë të rëndësishëm të shtetit, janë shtuar ndjeshëm.
Nisur nga kjo situatë, Prokuroria e Përgjithshme shpreh angazhimin e plotë për mbështetjen e çdo prokurori të Republikës që ushtron detyrën në përmbushje të plotë të ligjit dhe Kushtetutës.
Gjithashtu, Prokuroria e Përgjithshme do të vijojë të kërkojë me forcë nga të gjithë folësit publikë që të tregojnë maturi kur komentojnë punën e prokurorëve. Për shkak të sulmeve publike, prokurorët tashmë janë kthyer në subjekte të shantazhit dhe kërcënimit nga persona që përballen me ligjin për veprat penale që kanë kryer.
Prokuroria e Përgjithshme, duke ritheksuar mbështetjen e saj për Reformën në Drejtësi, vlerëson se fjalori kundër prokurorëve, i përdorur për të justifikuar ndryshimet ligjore, ka demotivuar këta të fundit, të cilët, gjithësesi po vijojnë të përfaqësojnë denjësisht shtetin në proceset penale për persona të përfshirë në vepra penale.
Prokuroria e Përgjithshme kërkon nga prokurorët e Republikës që, për çdo rast shqetësimi apo kërcënimi gjatë ushtrimit të detyrës së tyre, të njoftojë Prokurorinë e Përgjithshme, me qëllim që bashkërisht të veprojmë me të gjitha mjetet ligjore, për të siguruar mbrojtjen e integritetit të tyre fizik dhe profesional.