Farmacistët që kaluan provimin e shtetit, UFSH: Si anëtarësoheni
Dalin dhe kriteret për ata që duan të pajisen me leje, duhet të paguajnë 5.000 lekë Dokumentet dhe procedura që duhet ndjekur
Të gjithë farmacistët e rinj, të cilët kaluan me sukses provimin e shtetit duhet të bëjnë anëtarësimin pranë Urdhrit të Farmacistëve të Shqipërisë për të fituar të drejtën e ushtrimit të profesionit. Ndërkohë që, UFSH ka publikuar procedurën dhe dokumentacionin e nevojshëm që duhet të dorëzojë çdo i interesuar. Farmacisti që kërkon të anëtarësohet duhet të paraqitet personalisht në Këshillin Rajonal të UFSH, në qytetin ku banon për të dorëzuar dokumentacionin e kërkuar. Fillimisht ata duhet të dorëzojnë një kërkesë, sipas formatit të miratuar nga Këshilli Kombëtar, e cila mund të shkarkohet edhe në faqen online të UFSH- së. Po ashtu, nevojitet fotokopja e diplomës universitare dhe listës së notave të noterizuara. Ndërkohë që, ata kandidatë, të cilët janë diplomuar jashtë Shqipërisë duhet të paraqesin njësimin e diplomës së tyre në Ministrinë e Arsimit dhe Sportit, fotokopje të përkthyer dhe të noterizuar të diplomës dhe listës së notave dhe fotokopje të përkthyer dhe noterizuar të vërtetimit të kryerjes së provimit të shtetit. Dokumentacioni duhet të plotësohet edhe me fotokopje të kartës së identitetit ose pasaportës, me 3 fotografi si dhe mandat pagesën për tarifën e regjistrimit, në vlerën 1500 lekë. Në rast se ka ndryshim të të dhënave personale, siç mund të jetë emri apo mbiemri, nevojitet dhe certifikata nga gjendja civile. Ajo çka vlen të theksohet është fakti se çdo profesionist duhet të jetë pjesës e listës që Agjencia Kombëtare e Provimeve ka dërguar tashmë në UFSH, ku vërtetohet kalimi me sukses i provimit të shtetit.
LEJA
Ndërkaq, në rastin e aplikimit për certifikatë si i punësuar, farmacisti përveç gjithë dokumenteve të mësipërme duhet të dorëzojë edhe disa dokumente shtesë. Nëse ai ka qenë më parë anëtar i UFSH- së, por pa ush- truar profesionin, duhet të paraqesë fotokopjen e kartës së anëtarësisë si dhe vetë deklarimin sipas formatit të miratuar nga Këshilli Kombëtar. Po ashtu, nevojitet kontrata e punës me punëdhënësin, fotokopje e ekstraktit historik të Qendrës Kombëtare të Regjistrimit të subjektit farmaceutik të 3 muajve të fundit si dhe fotokopjen e Qendrës Kombëtare të Licencimit. Po ashtu, janë të domosdoshme: fotokopja e certifikatës së Urdhrit të drejtuesit teknik të subjektit farmaceutik ku do të punësohet, gentplani dhe plan vendosja e objektit ku do të ushtrohet profesioni si dhe deklarata e pronarit të subjektit farmaceutik. Aplikantët duhet të paraqesin dhe mandatpagesën për lejen e ushtrimit të profesionit në vlerën 5000 lekë.