ALUIZNI, tapi për 2103 pronarë
Miratohet kalimi i pronësisë mbi truallin për parcelat ndërtimore të llogaritura sipas formulës Sipërfaqet për çdo përfitues në Tiranë, Durrës, Elbasan, Shkodër, Berat e Korçë
Rreth 2103 persona që kanë ndërtuar pa leje në tokën e të tjerëve, ose në tokën e shtetit do marrin tapitë për sipërfaqen e truallin. Vendimi është miratuar në mbledhjen e fundit të qeverisë dhe lista me përfitues dhe sipërfaqet përkatëse publikohet nga ALUIZNI. Në total janë 977 parcela ndërtimore me 2103 pronarë në Tiranë, Durrës, Elbasan, Shkodër, Berat, Korçë. Ligji i legalizimeve parashikon që kalimi i pronësisë për objektet me funksion banimi të bëhet për sipërfaqe deri në trefishin e bazës së ndërtuar, por jo më shumë se 500 m2. Për sipërfaqet deri në 300 m2 toka do të paguhet me gjysmën e vlerës së tregut, por jo më shumë se 2000 lekë/ m2 për zonat urbane dhe 1500 lekë/ m2 për komunat. Veç kësaj, në ligjin e ri janë përcaktuar edhe disa lehtësi të tjera në pagesën e faturës për tokën e zënë. Vendimi së bashku me listën e pronarëve dhe sipërfaqet e tokës është botuar në dje në Fletoren Zyrtare.
LISTA
Këshilli i Ministrave miraton listën e pose- duesve të objekteve pa leje dhe sipërfaqet e parcelave ndërtimore, për të cilat ngarkon ALUIZNI- n të lidhë kontratën e kalimit të së drejtës së pronësisë. Çmimi i shitjes së parcelës ndërtimore për ndërtimet pa leje me funksion social- ekonomik është ai i përcaktuar në bazë të vlerës së pronës, të miratuar me vendim të Këshillit të Ministrave. Sipas vendimit, deri në momentin e regjistrimit të ndërtimit të legalizuar, zyrat vendore të regjistrimit të pasurive të paluajtshme të mos kryejnë ndryshime të gjendjes juridike të pasurive të listuara në këtë vendim.
KALIMI I PRONËSISË
Kalimi i së drejtës së pronësisë mbi parcelën ndërtimore të objektit pa leje bëhet sipas dispozitave të Kodit Civil. Sipërfaqja e parcelës për të cilën miratohet kalimi i së drejtës së pronësisë, si rregull, nuk mund të jetë më e madhe se trefishi i sipërfaqes së bazës së ndërtimit pa leje. Sipërfaqet mbi masën e përcaktuar në këtë pikë, të cilat për shkak të përmasave ose konfiguracionit nuk mund të shfrytëzohen më vete për ndërtim, i shiten poseduesit të ndërtimit pa leje sipas vlerës së pronës, të miratuar me vendim të Këshillit të Ministrave, vetëm nëse ka shprehur më parë vullnetin nëpërmjet një kërkese me shkrim.