SHBA, diskutohet eliminimi i lotarisë emigruese
Propozimi: Numri do të reduktohet me 50% në 10 vitet e ardhshme, të orientohemi drejt forcimit të tregut vendës Kongresmenët amerikanë, gati të ndryshojnë politikat për refugjatët
ndrrat e më shumë se 200 mijë shqiptarëve për të prekur tokën e premtuar nëpërmjet Lotarisë Amerikane ka shumë gjasa të shuhen, pasi Shtetet e Bashkuara të Amerikës po përgatiten të ndryshojnë politikat e tyre për emigrantët. Kanë qenë dy senatorët Tom Cotton ( Republikan) dhe David Perdue ( Demokrat) që kanë propozuar një legjislacion, i cili do të reduktojë ndjeshëm numrin e emigrantëve që do të pranohen në SHBA. Kjo është pjesë e asaj që njihet si Reforma e Emigracionit në Amerikë për një punësim më të fortë ( Raise Act). Projektligji në fjalë parashikon që të ketë një ndikim të gjerë, pasi nga 1 milion emigrantë që pranohen mesatarisht në vit nga SHBA, numri do të reduktohet me 50% në 10 vitet e ardhshme. Edhe presidenti i Dhomës Amerikane në Shqipëri ( AmCham), Mark Crowford tha për "Monitor" se politika amerikane tashmë po orientohet drejt forcimit të tregut vendas dhe reduktimit në masë të emigracionit. Sipas tij tregu amerikan pritet të nxitet edhe nga politika e reduktimit të taksave që do të zbatohet nga presidenti Trump. Projektligji i propozuar pritet të prek edhe programin DV, për të cilin emigrojnë edhe shqiptarët, por jo ato të tipit H1B." Është koha që sistemi ynë i emigracionit të punojë për punëtorët Amerikanë", tha senatori Cotton. Sipas tij, "RAISE Act" do të synojë promovimin e pagave më të larta për punëtorët amerikanë, të cilët mund të mund të ndërtojnë një të ardhme më të mirë. RAISE Act, do të ulë emigracionin në 637,960 persona vitin e parë dhe në 539,958 në vitin e dhjetë të zbatimit. Në vitin 2015 në SHBA mbërritën 1,051,031 emigrantë. Programi "Diversity Immigrant Visa Program" ( DV Program) i cili zbatohet edhe në Shqipëri lejon përfitimin e 50,000 visave emigratore, të cilat sigurohen përmes përzgjedhjes rastësore. Legjislacioni që propozohet synon reduktimin e emigrantëve në harkun kohor të 13 viteve. Pas viteve ' 90, lotaria amerikane ka qenë mjaft e preferuar për shqiptarët, teksa me dhjetëra individë e familje janë larguar drejt tokës së premtuar. Për vitin 2015 numri i aplikuesve shqiptarë për Lotarinë Amerikane arriti në 200,000, më i larti i shënuar ndonjëherë. Programi i lotarisë ka filluar para 24 vitesh dhe ka për qëllim të krijojë një diversitet të emigrantëve që vijnë në SHBA duke përzgjedhur 55 mijë aplikacione nga miliona që aplikojnë. Më 2013 nga Shqipëria vizën emigruese për
në SHBA e kanë fituar 1,520 veta ndërsa më 2014 ky numër është dyfishuar 3.289, që i bën shqiptarët ndër përfituesit më të mëdhenj të programit të lotarisë nga e gjithë bota. Në lotarinë e vitit 2013 për 55 mijë vizat emigruese janë bërë rreth 8 milionë aplikacione. Përmes lotarisë vijnë emigrantë edhe nga vende perëndimore, si Gjermania dhe vende të tjera evropiane, por disa vende janë përjashtuar
nga pjesëmarrja për shkak të ardhjes së shumë emigrantëve prej atje, si Kanadaja, Kina, Polonia, Britania Madhe dhe shumë vende të Amerikës Latine. Në debatin që po zhvillohet në Kongres, lidhur me reformën në politikën e emigracionit, një ndër propozimet ka qenë edhe eliminimi i lotarisë emigruese si kompensim i legalizimit të miliona personave që qëndrojnë ilegalisht në SHBA.