Meta- Lu, takimi 2 orë në Kuvend: Bashkë për reformën në drejtësi
Ambasadori i SHBA sqaron heqjen e vizave: Do iknin jashtë me pasuritë e tyre Ambasada: Kemi besim te kreu i Kuvendit
Ambasadori i SHBA- ve, Donald Lu dhe kreu i Kuvendit, Ilir Meta biseduan dje për gati 2 orë me njëri- tjetrin në Kryesinë e Kuvendit, për herë të parë pas replikave që shkëmbyen si reagime ndaj kryeprokurorit Adriatik Llalla. Pas takimit, në një njoftim të saj, ambasada e SHBAve në Tiranë u shpreh: “Ambasadori Donald Lu dhe Kryetari i Kuvendit, Ilir Meta zhvilluan një takim pozitiv sot ( dje). Ambasadori Lu u angazhua të vazhdojë të punojë ngushtë me parlamentin për zbatimin e reformës në drejtësi. Ambasada e SHBA- ve ka besim të madh që me mbështetjen e Kryetarit të Kuvendit Meta, Shqipëria do të realizojë këtë reformë historike për të gjithë shqiptarët. Kryetari i Kuvendit Meta dhe Ambasadori Lu diskutuan gjithashtu edhe për rëndësinë e reformës zgjedhore dhe procesin e dekriminalizimit”. Ndërsa kreu i Kuvendit, Ilir Meta, në një prononcim për gazetarët tha se me ambasadorin Lu dhe ekipin e tij kishin pasur një takim mjaft konstruktiv. “Natyrisht, ky takim tepër konstruktiv dhe bashkëpunues është fokusuar në rëndësinë e vazhdimit të zbatimit të reformës në drejtësi në mënyrë sa më transparente, parimore dhe institucionale.
Dhe, natyrisht që ky takim është përqendruar edhe në rëndësinë e zgjedhjeve të ardhshme, të standardit të tyre, dhe në përpjekjet që duhen bërë për të përmbyllur reformën zgjed- hore, që duhej të ishte përmbyllur me kohë sa më shpejt, në përputhje edhe me rekomandimet e OSBE- ODIHR- it”, - tha Meta, i pyetur nga mediat. “Por, - shtoi më tej, Meta, - sigurisht u diskutua edhe për rëndësinë e vazhdimit të procesit të dekriminalizimit si mjaft jetik për standardin e zgjedhjeve të ardhshme, por edhe besueshmërinë e reformës në drejtësi, në procesin e zbatimit të së cilës tashmë kemi hyrë”. I pyetur në lidhje me rezervat që shprehu ministri i Drejtësisë Vasili ndaj Operacionit të Monitorimit, Meta tha: “Nuk jam këtu për të diskutuar për detaje apo çështje të ndryshme, por për të konfirmuar edhe një herë vullnetin tonë për të bashkëpunuar ngushtë me të gjitha institucionet brenda vendit, që kanë përgjegjësitë e tyre në zbatimin e reformës në drejtësi dhe në mënyrë të veçantë me ambasadën e SHBA- ve dhe Shteteve të Bashkuara të Amerikës si partner kyç në këtë reformë, por edhe si një faktor shumë i rëndësishëm për stabilitetin dhe sigurinë e Shqipërisë si një vend anëtar i NATO- s”.
AMBASADORI
Ndërkohë, sipas burimeve të “TCH”, në takimin me disa politikanë, ambasadori amerikan Lu ka sqaruar se verifikimi i vizës së kryeprokurorit ka qenë e vetmja nismë e ndërmarrë nga Tirana dhe ka qenë një vendim i Konsullatës, jo i ambasadorit. “Ky ishte një urdhër dhe unë nuk kisha opsione ta zbatoja apo jo. Për njerëzit që u është hequr viza, kishte dyshime se qëllimi i tyre ishte të iknin nga Shqipëria bashkë me pasuritë e vëna nga korrupsioni, dhe në Shtetet e Bashkuara nuk e pranojnë këtë”, mësohet të jetë shprehur ambasadori Lu.
Sa i përket procesit të vetingut, ambasadori Lu ka prekur një nga pikat më delikate të vetingut, e kundërshtuar nga opozita edhe në Gjykatën Kushtetuese, atë të kontrollit nga qeveria të dy drejtorive kyçe që japin informacion për organet e vetingut, Drejtoria e Kontrollit të Figurës dhe ajo e Pastrimit të Parave. Lu është shprehur se e ka ndarë këtë shqetësim të Partisë Demokratike edhe me kryeministrin Rama, për t’i dhënë më shumë besueshmëri procesit të vetingut.