KLD nis hetimin për 5 gjyqtarët që shfajësuan “Hakmarrja për Drejtësi”
Presidenti Nishani i kërkoi Inspektoratit të KLD të verifikojë dyshimet
Këshilli
i Lartë i Drejtësisë njoftoi dje, se “me kërkesë të Presidentit të Republikës, njëherazi Kryetar i Këshillit të Lartë të Drejtësisë, Inspektorati i KLD- së filloi hetimin për të verifikuar dyshimet e arsyeshme të ngritura në media dhe në opinionin publik për shkelje disiplinore të gjyqtarëve të Gjykatës së Apelit për Krime të Rënda Tiranë”. “Nga shqyrtimi paraprak i ngjarjes së transmetuar dhe nga shqetësimi i ngritur nga Presidenti i Republikës, njëherazi kryetar i Këshillit të Lartë të Drejtësisë, u konstatua se ka vend që Inspektorati i KLD- së, të verifikojë veprimtarinë gjyqësore të gjyqtarëve të Gjykatës së Apelit për Krime të Rënda Tiranë, Alaudin Malaj, Artur Kalaja, Stavri Kallço, Sotiraq Lubonja dhe Etleva Temo, për akte dhe sjellje që diskreditojnë rëndë figurën e gjyqtarit në funksion të zgjidhjes së parregullt të një çështjeje gjyqësore penale”, thuhet në njoftimin e KLD- së, pas dhënies së pafajësisë për 11 anëtarët e “Hakmarrja për Drejtësi”. “Konkretisht, në mbështetje të nenit 101, pika 1, të ligjit nr. 96/ 2016, duhet të hetohet nëse gjyqtarët që kanë gjykuar çështjen penale në fjalë: haptazi nuk i janë referuar ligjit ose fakteve për shkak të pakujdesisë së rëndë ose dashjes; apo në mënyrë të pajustifikuar, kanë kryer akte dhe sjellje të papërshtatshme gjatë ushtrimit të detyrës ose jashtë saj, që diskreditojnë pozitën dhe figurën e gjyqtarit ose që dëmtojnë rëndë besimin e publikut në sistemin gjyqësor”, thuhet në njoftim.
GJYKATA KUSHTETUESE
Gjykata Kushtetuese hodhi poshtë dje padinë e Unionit të Gjyqtarëve që kërkonte rrëzimin e ligjit për rivlerësimin kalimtar të gjyqtarëve dhe prokurorëve ( vetingun). Gjykata e vlerësoi ligjin në përputhje me Kushtetutën. Me rrëzimin e kësaj kërkese, nuk ekziston më asnjë pengesë për zbatimin e ligjit.