Nga marsi, qytetarët do paguajnë 5 lekë për çdo qese nëpër supermarkete
Veliaj: Janë zëvendësuar 1.700 kapakë pusetash
Qytetarët
do të duhet të paguajnë për çdo qese që do të marrin në market. Kryebashkiaku Erion Veliaj e bëri të ditur gjatë analizës vjetore të punës së Ndërmarrjes Nr. 2 të Punëtorëve të Qytetit, ku sqaroi se, duke filluar nga ky vit, do të bëjë të detyrueshme pagesën prej 5 lekësh për çdo qese që merret në supermarket në mënyrë që të ndërgjegjësojë qytetarët që t'i përdorin ato sa më pak. "Po bëjmë një marrëveshje me supermarketet, që duke filluar nga kjo pranverë qeset në Tiranë të bëhen me pagesë simbolike. Besoj se i kemi të gjitha shanset të kemi të njëjtin rezultat në Tiranë, jo për 5- lekëshin e qeseve, por për t'u dhënë njerëzve një dekurajim nga përdorimi i panevojshëm i tyre. Sot jemi vendi që përdor më shumë qese për frymë në Europë", - theksoi kryetari i bash- kisë. Veliaj bëri të ditur se ndryshimi që po ndodh në Tiranë vjen edhe si pasojë e punës së Ndërmarrjes Nr. 2, e cila është e prekshme çdo ditë. Ai theksoi se një vëmendje e veçantë do të vazhdojë t'i kushtohet rikonstruksionit të trotuareve si dhe korsive të dedikuara, ku pritet të shtohen 10 të tjera korsi të dedikuara për biçikleta dhe për autobusët. Ndër të tjera, Veliaj vuri në dukje punën e kryer nga punonjësit e Ndërmarrjes Nr. 2 për zëvendësimin e pusetave të cilat vidheshin për skrap, duke u kthyer në një shqetësim real për banorët dhe shoferët e makinave. "Kemi zëvendësuar 1.700 puseta me kompozim plastikë- beton. Një produkt, i cili sigurisht që kushton, por nuk ka vlerë të rishitet po të vidhet sepse nuk riciklohet", - u shpreh Veliaj.