Ilir Meta: Ka përpjekje për të tensionuar situatën parazgjedhore
LSI zgjedh drejtuesit për Tiranën, Braimllari kryetar, Bahri Shaqiri nënkryetar “Dekriminalizimi, domosdoshmëri për standardin e zgjedhjeve”
Kryetari i LSI- së, Ilir Meta i cilësoi të rëndësishme zgjedhjet e 18 qershorit për partinë që ai drejton. Gjatë fjalës përshëndetëse që Meta mbajti gjatë mbledhjes së Komitetit Drejtues të LSI- së për degën e Tiranës, u shpreh se ka tentativë për të tensionuar situatën parazgjedhore. Ndërkohë, KD i LSI- së për Tiranën zgjodhi dje kryetarin e saj, Endrit Braimllari. Kryetar i Komitetit Drejtues të LSI Tiranë u zgjodh Brunilda Paskali, ndërsa Ardit Çela, Bahri Shaqiri dhe Linda Karadaku u zgjodhën tre nënkryetarët e LSI Tiranë. Sekretari i ri Organizativ i LSI, Tiranë, do të jetë Rigels Gjikdhima. Në fjalën e tij në këtë aktivitet, kryetari i Kuvendit, Ilir Meta pasi uroi të zgjedhurit, tha: “Përgatitjet për 18 qershorin në të gjitha drejtimet si organizative, ashtu edhe programore nuk duhet të na shpërqendrojnë nga angazhimi ynë për të mos humbur fokusin nga disa prej reformave më të domosdoshme që ka vendi dhe që kanë të bëjnë edhe me vetë klimën përpara zgjedhjeve. Sikurse është vazhdimi në mënyrë transparente të reformës në drejtësi, për zbatimin e saj, pasi është edhe një kërkesë dhe një kusht për hapjen e negociatave për anëtarësim në BE. Por njëkohësisht është shumë e rëndësishme për të gjithë klimën politike parazgjedhore që të jetë sa më konstruktive, sepse vëmë re që nuk mungojnë përpjekjet për të tensionuar artificialisht situatën paraelektorale”. Meta theksoi se për të arritur standardet më të larta në zgjedhje, të gjithë aktorët politikë duhet të investohen fuqishëm në implemen- timin e plotë të dekriminalizimit. “Padyshim vazhdimi i pandalshëm i procesit të dekriminalizimit që është një tjetër detyrim, por edhe standard për zgjedhjet e ardhshme të 18 qershorit dhe seriozitetin e çdo force politike për të kontribuar për një nivel të lartë të integritetit të përfaqësuesve publikë të qytetarëve shqiptar”, - u shpreh Meta. “Në të gjitha këto aspekte, dua të shpreh edhe një herë angazhimin tonë si LSI për të gjeneruar gjithnjë një klimë sa më konstruktive, sa më racionale, që ndihmon ecurinë e suksesshme të këtyre reformave që do të kenë një impakt afatgjatë për të ardhmen e vendit, stabilitetin e tij, funksionimin e institucioneve e integrimin evropian dhe njëkohësisht dua të shpreh vendosmërinë tonë për t’i shërbyer në radhë të parë standardit më të lartë të zgjedhjeve të ardhshme të 18 qershorit, sepse rezultati i këtij standardi, pra i një standardi të zgjedhjeve për vendin është më i rëndësishëm se rezultati i çdo force politike të caktuar”, theksoi kreu i LSI- së. Z. Meta theksoi në mbledhjen e KD- së së Tiranës se shumë shpejt do të nisë puna për hartimin e programit të Lëvizjes Socialiste për Integrim. “Jam i bindur që dega e Tiranës do të jetë në krye të rezultatit jo vetëm të zgjedhjeve të 18 qershorit, por edhe të gjithë performancës së Lëvizjes Socialiste për Integrim në të gjithë vendin si një shembull i një force të emancipuar, të përgjegjshme, e cila gjithnjë vë interesat e vendit dhe të qytetarëve, vë interesin kombëtar dhe interesin publik mbi çdo interes tjetër afatshkurtër apo të ngushtë”, tha Meta. Ai përfitoi nga prania në Konventë për të uruar edhe pavarësinë e Kosovës.