ONM, Bushati: Nuk jam dakord me nostalgjikët e filmave me diversantë
Ministri i PS u përgjigjet aleatëve
Ministri
i Punëve të Jashtme, Ditmir Bushati e cilë soi të pavend letrën që ministrja e Integrimit, Klajda Gjosha i dërgoi komisionerit Johannes Hahn për çështjen e ONM- së, por edhe shqetësimet e Vasilit. Gjatë një bisede në Universitetin e Shkodrës, Bushati u shpreh: “Nuk ka zhvillim ekonomik të qëndrueshëm pa mburojën e së drejtës. Prandaj nuk bie dakord me nostalgjikët e filmave me diversantë, që kërkojnë ta portretizojnë këtë reformë si ndërhyrje e të huajve në punët tona, apo si cenim sovraniteti. Sepse besoj fuqimisht që kjo reformë është konkretizim i ndërgjegjes kolektive, e cila kërkon dhe mirëpret ndryshim”. I pyetur për letrën e Gjoshës, Bushati u përgjigj: “Ne kemi nevojë për më shumë drejtësi dhe për ndihmën dhe ekspertizën ndërkombëtare, e cila në këtë proces është e paçmueshme, sepse siç edhe mund të keni vënë re, ka një kalcifikim të interesave në sistemin e drejtësisë. Ka një humbje besimi të opinionit publik për çka ngjet dhe për fat të keq për herë të parë pas kaq e kaq shumë vitesh ka edhe një kapadaillëk ndaj partnerëve tanë strategjikë. Mendoj që për asnjë moment ne s’duhet ta humbin busullën tonë orientuese, sepse shqiptarët gjatë këtyre 27 viteve kanë qenë në anën e drejtë të historisë dhe kjo reformë për mua është konkretizim i ndërgjegjes kolektive që kërkon ndryshim në këtë fushë, ndryshim i cili në gjykimin tim do të ketë pasoja pozitive edhe për skenën politike, edhe për skenën mediatike, edhe për biznesin”, deklaroi Bushati.