KLD sqaron Xhafajn: Lista e KED, sipas ligjit

Sekretari i përgjithshëm: Po shtrembëroni emrat e institucioneve të reja

Këshilli

i Lartë i Drejtësisë deklaroi dje se në punën e tij për zgjedhjen e kandidatëve për Këshillin e Emërimeve ka ndjekur rrugën e ligjit dhe ka pasur transparencë të plotë. Në një letër të sekretarit të përgjithshëm të KLD- së, Pjerin Prendi, dërguar Presidentit të Republikës, Bujar Nishani dhe për dijeni kreut të Kuvendit, Ilir Meta e kreut të Komisionit parlamentar të Ligjeve, Fatmir Xhafaj, KLD sqaron pretendimet e Xhafajt në letrën e pak ditëve më parë.

Këshilli i Lartë i Drejtësisë kujton se presidenti e shtyu shortin për KED- në në konsultim me partitë politike, për shkak të mungesës së ligjit. “Në këto takime u deklarua se përfaqësuesit e grupeve parlamentare i kërkuan presidentit që shorti të hidhej pas miratimit të ligjit, i cili do të përcaktonte kritere më të detajuara për kandidatët e KED- së. Në atë kohë nuk rezulton të ketë pasur asnjë qëndrim tjetër nga zoti Xhafaj”, ka deklaruar KLD. Sipas KLD- së, lista është hartuar me transparencë të plotë dhe për 128 gjyqtarë janë evidentuar të gjitha të dhënat personale. “Duke marrë në konsideratë kriteret e përcaktuara në pikën 2, të nenit 221 të ligjit ‘ Për organet e qeverisjes së sistemit të drejtësisë’ u konstatua se nga lista me 128 gjyqtarë që kanë organikat e gjykatave të apelit dhe të gjykatave administrative në Republikën e Shqipërisë, vetëm 28 gjyqtarë plotësonin kriteret për t’u përfshirë në shortin për zgjedhjen e anëtarëve të Këshillit të Emërimeve në Drejtësi. Lista me 28 gjyqtarë, të cilët i plotësonin kriteret i është dërguar Kuvendit nga sekretari i përgjithshëm i KLD- së”, thuhet në letrën e këtij institucioni. Më tej, letra vijon: “Përpos kësaj liste, me të njëjtën shkresë, nr. 152/ 1, prot. datë 18.01.2017 i është dërguar Kuvendit të Shqipërisë me një transparencë të plotë edhe lista analitike, e cila përmban informacion të detajuar në formë tabelore, ku janë evidentuar të dhënat e 128 gjyqtarëve të gjykatave të apelit dhe gjykatave administrative, të dhëna këto në raport me plotësimin ose jo nga ana e tyre të kritereve të ligjit për të qenë anëtarë të KED”. Në letër sqarohet se pas dërgimit të këtij informacioni, sekretari i përgjithshëm i Kuvendit ka kërkuar sqarim lidhur me listat e kandidatëve. Brenda së njëjtës ditë - vijon letra e KLD- së - nga kërkesa e bërë i është kthyer përgjigje. Më tej, në këtë letër sekretari i përgjithshëm i KLD- së sqaron deklaratat e kreut të ‘ Ligjeve’ në Kuvend, Fatmir Xhafaj. Prendi shprehet se, “Kushtetuta nuk ka parashikuar në asnjë nen të saj ndonjë ‘ Këshill të Përkohshëm’, por vetëm Këshilli i Emërimeve në Drejtësi. Ndryshimi deri në shtrembërim i termave të institucioneve të reja kushtetuese siç në rastin e mësipërm me ‘ këshill të Përkohshëm’ apo emërimi me terma të rinj, të papërcaktuara në Kushtetutë apo në ligj konsiderohet si veprim aspak i bazuar apo për më tepër në frymën e Kushtetutës. Në asnjë dispozitë kushtetuese, në cilësinë e sekretarit të përgjithshëm nuk është përcaktuar tagri apo e drejta të bëjë interpretimin e Kushtetutës apo ligjeve, apo për më tepër të hamendësojë se çka dashur apo çka pasur në mendje legjislatori, por vetëm detyrimi për të qëndruar strik dhe në mënyrë rigoroze Kushtetutës dhe ligjit, ashtu siç kemi bërë edhe në hartimin e kësaj liste”, shkruan në letër sekretari i Përgjithshëm i KLD- së.