Alban Hoxha: Tirana, një kundërshtar i mesëm
Hoxha është jo vetëm një prej ikonave dhe kapiten i Partizanit por edhe një lider i vërtetë në fushën e lojës për të "kuqtë". Me 12 ndeshje derbi mbi shpatulla, gardiani i katërkëndëshit të Partizanit e njeh më mirë se kushdo në grupin e kuq rëndësinë e një sfide të tillë. "Çdo ndeshje për ne është e rëndësishme. Derbi ka specifikën e vet sepse luhet për shumë gjëra. Besoj se edhe Tirana do të luftojë sepse vjen nga një moment i keq. Ne dëshirojmë pat- jetër tre pikët sepse po luftojmë për titullin". 29vjeçari do të drejtojë skuadrën nga fusha e blertë dhe për herë të parë gjatë këtij sezoni, Partizani do ta luajë një ndeshje derbi në kryeqytet, pikërisht në atë që tifozët bardheblu e konsiderojnë "Shtëpia e Tiranës". "Nuk ka asnjë problem për mua madje klubit i kisha thënë se nuk do të ishte problem edhe nëse luanim në Elbasan megjithatë kjo është një lëvizje pozitive për tifozët që e kishin të vështirë të na ndiqnin në Elbasan". Tirana vjen pas tre humbjeve rresht, por Hoxha nuk mendon se kjo mund të ndikojë negativisht apo qoftë edhe pozitivisht për Partizanin. Partizani i fortë me të fortët dhe i dobët me të dobëtit. A është Tirana një skuadër e forte apo e dobët? 29- vjeçari në këtë rast zgjedh diplomacinë. "Tirana është e mesme. Me ekipet kryesuese nuk kemi pasur shumë vështirësi por ndryshe ka ndodhur me ekipe të dorës së dytë, por Tiranën nuk e rendis në asnjë prej këtyre dy kategorive". Në fund një mesazh nga kapiteni edhe për të gjithë tifozët. "Janë mbështetja jonë shumë e madhe. Me Vllazninë mbushën stadiumin. Është një shtysë shumë e madhe dhe mendoj se këtë ndeshje do ta mbushin plot stadiumin, por kështu të bëjnë në çdo ndeshje".