Ftesa për LSI, Berisha: Çdo parti të kontribuojë për qeveri teknike
Ish- kryeministri: 100 mijë veta, gati të fshinin nga faqja e dheut “Ramën”
kryeministri Sali Berisha e ftoi dje kreun e LSIsë, Ilir Meta, të japë kontributin për një qeveri teknike. Berisha vizitoi dje në mbrëmje protestuesit para Kryeministrisë dhe deklaroi për mediat se “çdo forcë politike është e ftuar të bëjë bilancin dhe të vendosë nëse do qëndrojë në anë të Ramës dhe banditokracisë apo qytetarëve”. “Ky është një moment kritik për çdo forcë politike. Çdo forcë politike që nuk ka humbur prekjen, lidhjen me qytetarët, është e ftuar të bëjë bilancin, të bëjë zgjedhjen: nga ana e krimit e banditokracisë apo nga ana e qytetarëve. Nuk pengohet asnjeri që të japë kontribut për qeveri teknike”, - tha Berisha. Sipas tij, “qeveria teknike nuk është retorikë politike, por është mision”. I ulur këmbëkryq me protestuesit, Berisha tha: “Zgjedhje të qershorit me Ramën nuk mund të ketë, është moment kritik për kombin. Përveç vitit ‘ 91, nuk ka pasur kurrë protestë 4 muaj para zgjedhjeve. Nëse Rama nuk pranon, PD- ja do imponojë që ta pranojë me një këmbë. Do t’i tregojmë vendin atij që nuk është i ndjeshëm ndaj popullit. Qeverinë teknike do e vendosin forcat politike kush do e drejtojë, nuk pengohet njeri të japë kontribut për qeveri teknike”.
Ai ftoi të gjithë emigrantët të organizojnë protesta “kudo që janë nëpër ambasadat shqiptare e vendeve ku jetojnë”. “Nga 500 mijë që ishin dje në Tiranë, të paktën 100 mijë ishin gati ta fshinin nga faqja e dheut ‘ kazinonë’ e Edi Ramës, por iu nënshtruan vullnetit të qytetarëve. Ky është pushteti moral i vendit, ai është pushteti i maskave e krimit. Këta vendasit këtu, këta janë zotërit e Shqipërisë, ky është parlamenti, këtu është qeveria, institucioni i popullit shqiptar. Çdo minutë jam me shpirt e me zemër; do vij herë pas here, por këtu do e kem mendjen”, - tha Berisha.