Reagon Policia Shqiptare: Nuk është e vërtetë
Të
akuzuar për trafikun e drogës në vendet fqinje, autoritetet shqiptare kanë reaguar, për të sqaruar situatën. Policia Shqiptare ka dhënë një deklaratë për mediat, ku fliste për arrestimin e një shtetasi shqiptar në Itali dhe sekuestrimin e 10 tonëve drogë në Ankona. Policia ka theksuar se ajo që shkruan dje mediat italiane, ku akuzonin shqiptarët, është totalisht e pavërtetë. Në sqarimin e plotë të Policisë së Shtetit shkruhet: "Në lidhje me një lajm të publikuar në median online, dhe konkretisht duke iu referuar një shkrimi të publikuar në një media të shkruar në Itali, se janë sekuestruar në Ankona 10 tonë kanabis që vinte nga Shqipëria si dhe është arrestuar drejtuesi i kamionit, ju sqarojmë se lajmi është tërësisht i pavërtetë". Më tej thuhet se: "Nuk ka asnjë komunikatë zyrtare nga autoritetet italiane ligjzbatuese ku shprehet për sekuestrimin e kësaj sasie lënde narkotike dhe arrestimin e shtetasit shqiptar. Policia e Shtetit ka komunikim të vazhdueshëm dhe shkëmbim informacioni në kohë reale me autoritetet policore italiane, të cilat kanë konfirmuar se lajmi është i pavërtetë. Policia e Shtetit mbetet tërësisht e hapur dhe e gatshme të ofrojë informacion zyrtar për cilindo që e kërkon atë". Megjithatë, kjo nuk është hera e parë që shqiptarët akuzohen si "pronarë" të drogës që gjendet në vendet fqinje. Në Greqi janë zhvilluar disa operacione, nga të cilat janë sekuestruar sasi të mëdha droge dhe janë arrestuar shtetas shqiptarë. Edhe në Itali, prangosjet e shqiptarëve të përfshirë në trafiqe kanë qenë të shumta, e po ashtu edhe droga që u është gjendur në disponim ka qenë e konsiderueshme.