Rama: PD, në Kuvend, të provojë që nuk do bllokimin e vetingut
PS mbledh grupin, porosia për deputetët: Mos u merrni me protestën “Asnjë përçmim për protestuesit, s’biem në grackën e Saliut”
Kryeministri Edi Rama u kërkoi dje deputetëve në mbledhjen e përjavshme të grupit parlamentar që të intensifikojnë takimet dhe punën në bazën e partisë dhe të mos merren me protestën e PDsë. Burimet nga mbledhja e së hënës, bënë me dije për “Gazeta Shqiptare” se kanë qenë vetëm kryeministri dhe kreu i grupit, Gramoz Ruçi ata që kanë folur dje. Rama e Ruçi u kanë thënë deputetëve që të mos bien në vorbullën e deklaratave të PD- së, edhe nëse ata rikthehen në seancën e ditës së enjte në Kuvend. Sipas Ramës, PD- ja po kërkon alibinë e radhës për humbjen që e pret më 18 qershor. “Ata kërkojnë gjëra që nuk varen nga ne. Ne nuk i kemi penguar, madje u kemi kërkuar që çdo shqetësim që ka të bëjë me zgjedhjet të adresohet në Komisionin e Reformës Zgjedhore. Madje, kemi thënë se çdo kërkesë e opozitës për të cilën OSBE- ODIHR- i jep mbështetje, ka automatikisht edhe mbështetjen tonë”, - mësohet të jetë shprehur Rama. “Nuk duhet asnjë përçmim për protestën dhe protestuesit. Të mos biem në grackën dhe batakun ku ra Saliu, që denigronte protestat tona. Protestuesit duhet të kenë respektin tonë. Organizatorët e protestës janë çështje më vete, pasi ata kanë qëllime plotësisht të kundërta me ato që thonë. Ata kanë frikë nga vetingu dhe reforma në drejtësi”, - mësohet të jetë shprehur Rama, në fjalën e tij në mbledhjen e grupit parlamentar. Sipas burimeve, Rama mësohet të jetë shprehur se nëse PD- ja e do vërtet zbatimin e vetingut dhe reformën në drejtësi, të vijë në parlament për të votuar ngritjen e institucioneve të reja. “Vetëm kështu mund të provojnë se kjo protestë nuk ka për qëllim bllokimin e vetingut. Nëse opozita bojkoton parlamentin dhe bllokon vetingun, atëherë del qartë qëllimi i protestës: frika e opozitës nga vetingu”, - ka thënë kreu i PS- së. “Nga pikëpamja politike, kjo është një dhuratë për ne. Nga pikëpamja e interesit të vendit, kjo është një goditje e rëndë që synon të shpëtojë prokurorët dhe gjykatësit e korruptuar nga vetingu”, - komentoi ai.
POROSITË
Nga ana e tij, kreu i grupit parlamentar, Gramoz Ruçi përsëriti kërkesën e tij të përhershme, duke kërkuar më shumë vëmendje dhe përkushtim nga deputetët gjatë diskutimeve për projektligjet. Rama dhe Ruçi i kanë mëshuar fort pjesës së punës që u përket deputetëve në këta muaj para fushatës për zgjedhjet e përgjithshme. Objektivi i PS- së tashmë është të rimarrë votat e zgjedhjeve të 2013- ës. Një nga porositë kryesore për deputetët është që të evidentojnë të gjitha pakënaqësitë që kanë anëtarët apo elektorati dhe të mundin të zgjidhin, në koordinim edhe me ministrat apo drejtoritë rajonale, aq sa është e mundur shqetësimet e qytetarëve. Deputetët socialistë, veç kësaj duhet të tregohen të kujdesshëm edhe në raportet me aleatët e LSI- së, të cilët ende nuk kanë një vendim përfundimtar nëse do të jenë me PS- në në koalicion. Por, ajo çfarë mësohet nga burime brenda PS- së, është se cilido që të jetë vendimi i LSI- së, PS- ja do të duhet të luftojë për votat e saj, në mënyrë që të mbajë rolin drejtues, në koalicion ose jo. Objektivi i PS- së tashmë është të rimarrë votat e zgjedhjeve të 2013- ës. Një nga porositë kryesore për deputetët është që të evidentojnë të gjitha pakënaqësitë që kanë anëtarët apo elektorati dhe të mundin të zgjidhin, në koordinim edhe me ministrat apo drejtoritë rajonale, aq sa është e mundur shqetësimet e qytetarëve.