Kreu i Unionit, Mira: Meta të marrë përgjegjësinë, Rama të lërë qeverisjen
CDU, Ziemak: Të zhurmshëm sa dëgjoheshit deri në Gjermani
Kancelarja gjermane Angela Merkel përmes përfaqësuesve të saj shprehu dje mbështetjen për protestën e opozitës. Në çadrën e protestës, kreu i PD- së Lulzim Basha prezantoi mbrëmë të ftuarin special, përfaqësuesin e partisë së Angela Merkel në Gjermani, kreun e Forumit Rinor të Partisë Cristian- Demokrate z. Paul Ziemak. "Protesta juaj është aq e zhurmshme sa e dëgjojmë deri në Gjermani. Aq e zhurmshme sa vendosa të vij e t'ju mbështes. Erdha si qytetar i botës së lirë dhe si vëlla i njerëzve që kërkojnë demokracinë. Është hera e dytë për mua në këtë vend të mrekullueshëm dhe jam i lumtur që shoh kaq të rinj dhe mesazhi është: Në Gjermani, në Europë dhe në gjithë botën dëgjohet zëri juaj dhe duam t'ju mbështesim sepse të gjithë atyre që janë të korruptuar u themi që do t'ju mundim” - tha Ziemak. Në protestën e opozitës kreu i PD- së ftoi edhe kryetarin e unionit të të rinjve të djathtë në Europë, Javier Hurtado Mira. Pas mbështetjes që i ofroi të rinjve dhe njerëzve që kërkonin demokracinë dhe shtetin e lirë, Javier i bëri thirrje kryeministrit Rama që të linte qeverinë ndërsa kreu i LSI- së të marrë përgjegjësi për të nxjerrë Ramën nga qeveria. "Ne i kërkojmë Ramës që të lërë qeverinë dhe Metës të marrë përgjegjësinë, Meta, nëse je socialist i vërtetë, nxirre Ramën nga qeveria," tha Javier Hurtado Mira. Zyrtari evropian përgëzoi të rinjtë shqiptarë, pasi sipas tij ata i jepnin kurajë europianëve për të ecur para.