MBYLLET 0- 0

Frika fiton në Tirana- Flamurtari

Dikur

konsiderohej një nga duelet me të forta dhe spektakolare të futbollit shqiptar, sot një sfidë po aq e vagët sa atmosfera e krijuar nga një numër i vogël tifozësh në "Selman Stërmasi". Tirana dhe Flamurtari e përligjën etiketimin përballje- mbijetesë, duke ndarë nga një pikë pas një barazimi pa gola në ndeshjen përmbyllëse të javës së 23- të të kategorisë superiore. Josa dhe Duro, dy trajnerë me stof kampioni, duhet të ngushëllojnë apo të përgëzojnë njëri- tjetrin për një pikë mbijetese, që ndoshta në këtë rast i ka vlejtur më shumë Tiranës. Josa duhej të hidhte në fushë një formacion pa Hoxhallarin, Merveil dhe Cisen, ndërsa Duro u besoi të njëjtëve emrave dhe rreshtimi që dështoi përballë Teutës në debutimin e tij te kuqezinjtë. Në pjesën e parë loja e bardhebluve ishte krejtësisht apatike, me gabime të shumta në ndërtimin e manovrës sulmuese, aq sa në këtë pjesë nuk u regjistrua asnjë goditje drejt portës së Flamurtarit. Nga ana tjetër, kuqezinjtë nuk bënë mjaftueshëm me Danilo Alvesin dhe Galicin për të zhbllokuar rezultatin. E njëjta panoramë edhe në fillimin të pjesës së dytë, me Flamurtarin që i afrohet me lehtësi zonës së Tiranës, por braziliani Alves nuk është në ditën e tij më të mirë. Tirana zgjohet në fund, por për mungesë eksperiencë para portës fillimisht Asion Daja, të cilit i ndërhyn në momentin e fundit Halilaj, dhe më pas Bajramah, nuk ditën t'i shfrytëzuan rastet e krijuara. Pavarësisht ritmit më të lartë nga të dyja kampet në minutat e fundit, rreshtat mbetën të paprekur deri në vërshëllimën e fundit të gjyqtarit maltez Gelnn Tonna, i cili pati fatin që vendimet e tij të mos kontestoheshin nga futbollistët. Tirana pas këtij barazimi mbetet në vendin e pestë, me 28 pikë, një më pak se Luftëtari, ndërsa Flamurtari nuk arrin t'i largohet zonës së ftohtë.