Vendimi i BE- së: Ivanovi t'i japë mandatin Zaevit
Komisioneri Hahn: Pranoni ndryshimin, nuk ka vend për pengesa Gruevski vazhdon manovrat, takim me presidentin
Manovrat e fundit të Gruevskit për të rimarrë pushtetin duket se kanë dështuar, ndërsa shpresat e tij për t'u rizgjedhur kryeministër thuajse janë shuar plotësisht. Ish- lideri i Maqedonisë nuk e ka mbështetjen e Bashkimit Europian, i cili ka dalë tashmë hapur në mbështetje të rivalit të tij Zoran Zaev. BE- ja, i ka kërkuar shprehimisht presidentit të shtetit fqinj, Gjorgje Ivanov, që t'i japë mandatin e kryeministrit liderit të LSMD- së. Komisioneri europian i Zgjerimit, Johannes Hahn pret që pas mbledhjes së 67 firmave të nevojshme, presidenti Gjorgje Ivanov të mandatojë udhëheqësin e LSDMsë, Zoran Zaev, për krijimin e qeverisë së re në Maqedoni. "Ndryshimet në shoqëritë demokratike janë të natyrshme dhe duhet të përshëndeten kur vijnë si rezultat i zgjedhjeve të besuara", citohet të ketë thënë zyrtari i lartë i BE- së. "Pranimi dhe respektimi i rezultateve zgjedhore, si dhe e drejta e udhëheqësve për të tentuar krijimin e qeverisë është shenjë e demokracisë së shëndoshë. Pengesat dhe mosvlerësimi i përpjekjeve të tilla nuk kanë vend në një proces demokratik", - thekson Hahn. Sipas tij, për këtë arsye BE- ja pret nga të gjitha partitë që të respektojnë parimet dhe standardet demokratike, të angazhohen në mënyrë konstruktive dhe të kenë për qëllim mënyrën e bashkëpunimit në vend, e jo të nënvlerësojnë njëri- tjetrin. "Ishte pikërisht ky qëndrim që e çoi vendin drejt krizës", mësohet të ketë thënë Hahn. Komisioneri shtoi se opozita dhe mazhoranca kanë përgjegjësi dhe peshë në funksionimin e një demokracie, e që të dyja mund t'i japin formë ardhmërisë së shtetit. Ndërkohë, Nikola Gruevski vazhdon me tentativat e tij për të rimarrë qeverinë. Pas dështimit të negociatave me partitë shqiptare, kryetari i VMRO- DPMNE- së është parë mbrëmjen e së shtunës të hyjë në selinë e presidentit. Bashkë me të ka qenë edhe sekretari i qeverisë, e njëkohësisht funksionari i lartë i VMRO- DPMNE- së. Ende nuk ka asnjë deklaratë as nga Gruevski dhe as nga presidenti mbi atë që është diskutuar në këtë takim, sidoqoftë, pas ndërhyrjes së BE- së dhe marrëveshjes së LSDM- së dhe BDI- së, alternativat e Ivanov janë të pakta. Tashmë lidhja SocialDemokrate ka mandatuar liderin e saj, Zoran Zaev, për Kryeministër të Maqedonisë. Vendimi i miratuar nga organet më të larta të socialdemokratëve ka pasuar mbështetjen që kjo parti mori nga partia Bashkimi Demokratik për Integrim. BDI- ja, në mbledhjen e së premtes, e cila ka përfunduar para mesnate, ka vendosur t'i japë nënshkrimet e deputetëve të saj që Zaev të mund të kërkojë nga Presidenti i Maqedonisë, Gjorge Ivanov, marrjen e mandatit për formimin e qeverisë së re. Për t'u mandatar, lideri social- demokrat duhet të sigurojë edhe tri nënshkrimet e Aleancës Shqiptare, me të cilën po ashtu është në bisedime. Ndërkohë, mbështetjen ia ka premtuar edhe Lëvizja Besa. Kjo bën që Zaev të kërkojë mandatin nga Ivanov me 67 nënshkrime, nga 61 sa janë të nevojshme. Por a do t'ia japë mandatin Ivanovi? Mbetet të shihet, pasi ai paraprakisht ka paralajmëruar edhe mundësinë që nga Zaev të kërkojë edhe programin qeveritar, edhe pse në bazë të Kushtetutës programi prezantohet dhe miratohet vetëm në Kuvend. Mbetet e paqartë edhe përbërja e qeverisë pas paralajmërimeve të BDI- së se mundet të mbetet në opozitë, por të mbështesë një qeveri të pakicës.