Taksa e shtëpisë, formulari që do të plotësojë çdo qytetar
Operatori i Shpërndarjes së Energjisë do të mbledhë të dhënat për sipërfaqet dhe vitet e ndërtimit Adresari i ri, Ministria e Brendshme dhe ajo e Financave përpunojnë të dhënat
Vjelja e taksës së bane save bashkë me faturën e energjisë elektrike do të aplikohet pas vetëdeklarimit të çdo abonenti të OSHEE- së në lidhje me sipërfaqen e shtëpisë, shtesën ( në rast se ka) dhe vitin e ndërtimit të saj. Çdo qytetar do të jetë i detyruar të plotësojë të dhënat në formularin do t'i vihet në dispozicion nga punonjësit e OSHEE- së. Të dhënat do të jenë pjesë e Adresarit, që Ministria e Brendshme është duke azhurnuar në bashkëpunim me Operatorin e Shpërndarjes. Grumbullimi i të dhënave do të prodhojë edhe informacionin mbi sipërfaqet e banesave në të gjithë vendin, të cilat më pas Ministria e Financave do t'i përdorë për qëllime taksimi, ku me formulën e re të pritshme, taksa mbi pronën do paguhet mbi vlerën e tregut dhe jo me kuotë fikse. Ministria e Financave ka nënshkruar për këtë qëllim një memorandum me OSHEE- në për ndarjen e bazës së të dhënave. "Censusi" i OSHEE- së dhe Ministrisë së Brendshme për Adresarin e ri të apartamenteve është duke u aplikuar. Është duke u plotësuar një formular nga zotëruesit e apartamenteve në të gjithë vendin, i cili ka për qëllim të evidentojë të dhëna në lidhje me vendndodhjen e objektit, të dhëna për kryefamiljarin, të dhëna për NIPT- in nëse ka biznes. Gjithashtu, formulari kërkon të plotësohen të dhënat në lidhje me sipërfaqen e banesës dhe pronarin real të objektit.
FORMULARI
Në formular, i cili publikohet nga "Gazeta Shqiptare", kërkohet të plotësohen të dhëna të detajuara në lidhje me stacionin e kontratave të energjisë dhe të ujit. Për energjinë kërkohet nëse keni matës apo jo dhe nëse keni kontratë me OSHEE- në. Të njëjtat të dhëna do të kërkohen edhe për ujësjellës- kanalizimet. Këto të dhëna, pasi të grumbullohen nga kompanitë që ndodhen në terren, do të përdoren nga qeveria edhe për qëllim të kadastrës fiskale, që synon të vërë një tatim mbi pronën në bazë të vlerës së tregut, dhe jo një kuotë fikse siç aplikohet tani. Do të pilotohet taksimi i pasurisë sipas kësaj formule në qytetet e Tiranës, Durrësit, Korçës dhe Fierit, e më pas projekti do të shtrihet në të gjithë Shqipërinë. Ministri i Financave, në një prononcim ka pohuar se taksa e re e pronës do të vilet nëpërmjet faturave të energjisë. Ligji i ri i tatimit mbi pronën do të shkojë në parlament gjatë muajit shtator.
TAKSA
Taksa e shtëpisë që aplikohet e ndarë në dy fasha, ndërtimet para vitit 1993 dhe ato pas tij, do të paguhet me faturat e energjisë elektrike dhe të ujit. Fondi Monetar Ndërkombëtar i lë detyrë qeverisë shqiptare të aplikojë sa më parë në të gjithë vendin mbledhjen e taksës mbi pronën me faturat mujore të dritave dhe ujit.