Hakerat kompjuterikë, në 2 vite u mashtruan 50 biznese
Gjatë
dy viteve të fun dit, kanë qenë 50 raste mashtrimi, duke shkaktuar një dëm financiar prej 2.5 milionë eurosh, ndërsa personat më të prekur janë biznesmenët. Ky fakt u publikua dje nga vetë Policia e Tiranës në faqen e saj zyrtare. Sipas policisë, mashtrimi kompjuterik është kthyer në një problem shqetësues jo vetëm për të rinjtë, por së fundmi ka dëmtuar rëndë nga ana financiare edhe biznese të fuqishme shqiptare. "Në periudhën 2015- 2017, në Drejtorinë Vendore të Policisë së Tiranës janë denoncuar 50 raste të abuzimit nëpërmjet hakerave kompjuterikë, të cilët kanë përfituar një shumë të ardhurash rreth 2.5 milionë euro. Mekanizmi i vjedhjes, sipas specialistëve të Krimit Kompjuterik, bëhej nga hakerat që qarkullojnë online", thuhet në shkrimin e bërë publik nga policia. Personat me të prekur nga kostot financiare kanë qenë biznese të shumta të vendit tonë, të cilat kanë bashkëpunuar online me firma të ndryshme të huaja. Sipas specialistëve të Krimit Kompjuterik, hakerat hapin adresa të huaja të ngjashme me atë me të cilën bashkëpunon një biznes shqiptar, duke i ndryshuar disa karaktere të vogla në adresën e email- it, dhe veprojnë vetëm në kohën që bëhet derdhja financiare në bankë. Këtë shumë hakerat e depozitojnë më pas në një bankë në Angli, për arsye se në atë vend bëhen depozitime bankare online si dhe banka nuk mban përgjegjësi për shumën apo për t'i kthyer paratë mbrapsht biznesmenit të mashtruar. Nga ky mashtrim kanë rënë "pre" shumë biznese shqiptare, të cilat pohojnë se kanë kaluar deri në falimentim. Sipas tyre janë dy probleme të rëndësishme në rrjetin e mashtrimeve kompjuterike: Përdorimi i serverëve online çekë me adresë "Emkei. Cz"; veprimi online me bankat angleze. Hakerat më të rrezikshëm online janë evidentuar në Nigeri, në Kinë dhe në Europën Lindore. Ndërsa, policia i bën apel çdo përfaqësuesi të bizneseve të rishohin me kujdes çdo adresë të ardhur, të rishohin karakteret e adresës, e më pas të veprojnë me shitblerjen e mallrave.